就教科書分拆問題，教育局同書商大打口水戰，鬥到難分難解，好戲連場。呢，話口未完雙方又上演一齣「雞泡魚惡鬥軟皮蛇」嘞。
新一年度教科書價格日前出爐，近三千套中小學課本入面，分拆定價嘅得百分之八咁大把，價錢係咁意減些少，有啲甚至一個崩都冇得減，而未分拆課本就照加可也。書商擺到明當教育局冇到，好似軟皮蛇咁郁都唔郁，拖得就拖。
咁分明係玩嘢啫。連消委會都睇唔過眼，狠批教科書市場競爭者太少，選擇課本嘅係校方，而唔係畀錢嘅家長，市場扭曲到咗荒謬嘅程度。而畀人明剃眼眉嘅教育局局長孫明揚更加忍唔住度氣，指摘書商喺唔同時候提出唔同問題，從未嘗試解決，當局感到極度失望，唔會再容忍，會參考外國做法研究對策喎。
左一個極度失望，右一個唔會容忍，義正詞嚴，嫉惡如仇，睇嚟當局今次真係要玩鋪勁嘅噃。弊在呢個政府從來都係講一套做一套，表面上疾言厲色，實際上色厲內荏，大隻講冇料到。就好似雞泡魚咁，一有事就吸氣吹脹自己，趷晒啲刺出嚟，想嚇走對手，可惜往往徒勞無功。
講番教科書超貴呢個死結吖，學生家長畀書商任意魚肉，搞到天怒人怨，唔少人早就要求當局出招，包括公開招標引入新競爭、徹底改變現時嘅出版模式等等，但當局一於少理，咁多年來除咗小修小補，拖延時間又做過啲乜？就算做場分拆教材騷應付輿論，搞咗咁耐仲係一鑊泡，幾乎要爛尾添。
講多無謂，行動最實際。即使教育局高官扮晒魚蝦蟹，學埋雞泡魚，拍心口同書商揮過，如果齋噏唔做嘢，都係嘥氣嘅啫。書商在商言商，梗係賺到盡，睬你都傻啦。講到底，教科書市場之所以被扭曲到咁嘅地步，皆因港府食古不化，無所作為，如果話書商無良，咁港府就係無能喇。
話時話，教科書分拆爭議只係冰山一角，港府教育政策根本就混亂不堪。教改唔湯唔水搞到學校立立亂，教師叫苦連天，家長無所適從。依家係撥亂反正嘅時候喇，當局又有乜良策？唉，看守政府以等收工心態混日子，邊有良策吖！
最好笑嘅係，教育局玩靠嚇，如果書商一年後仍然拒絕將教材分拆定價，就會引入競爭，招標出版課本同埋教材喎。咪話功夫茶玩踢爆呀，一年之後政府換屆，高官個個拍吓屁股走人，下屆政府有排執手尾，教材分拆分分鐘拖多幾年都未定，學生繼續捱貴書都得咯！