劏房固然要清拆 安置窮人靠政策

馬頭圍道最近一宗唐樓三級大火，悲情之中嘅悲情係一位十九歲乖乖女，為咗救妹妹逃出火海而壯烈犧牲。唉，情是何物，直教生死相許？姊妹之情有時候偉大過轟轟烈烈嘅男歡女愛。

點解會有呢一場奪命大火嘅呢？消防員認為有縱火嫌疑，至於劏房問題咯喎，睇怕亦係罪魁禍首之一。所謂劏房，即係好似玩十字豆腐，將個別單位出一個二個豆腐膶空間，然後各自獨立出租。劏房一來涉及樓宇結構變化，例如加裝廁所隨時搞到水管滲漏，二來租客密密麻麻自然有大量雜物阻塞通道，一旦起火都唔知走去邊度避火頭。

講到呢度，功夫茶真係頂曾蔭權唔順，佢話喎，香港不存在「無瓦遮頭」嘅問題，樓市最大挑戰係如何協助中產人士置業。喂，如果你話天橋底都算係一種「瓦」，咁功夫茶冇嘢好講，之但係事實上香港好多人嘅生活環境真係悽慘到冇朋友。因乜事幹會有咁多人好似沙甸魚咁住喺劏房或者籠屋？咪就係房屋政策照顧唔到窮苦大眾囉，申請公屋又冇資格，租住私樓又唔夠錢，惟有死慳死抵入住劏房或者籠屋。真係要死慳死抵o架，事關呢一類港版貧民窟絕對唔係價廉物美，如果以每呎價格計算，隨時貴過半山豪宅！

正正因為房屋政策有嚴重缺陷，而香港又有過百萬窮人大軍，咁就造就咗大量劏房出現嘞，有求自然有供㗎啦。除咗住宅樓宇有好多劏房之外，家陣連工業大廈都有人玩十字豆腐。本報記者直擊大角咀兩幢工業大廈，發現每幢至少有兩層被改裝為劏房，甚至有人連天台嘅逃生位置都唔放過。你知啦，用於劏房嘅所謂建築材料好兒戲o架咋，基本上只係簡陋木板，一旦火燭後果不堪設想。如果天台逃生位置又堵塞，唔燒死都焗死啦！

好嘞，功夫茶想請教「好打得」嘅發展局局長林鄭月娥，劏房問題咁得人驚，係咪應該「好打得」咁樣去取締呀？唔講大家可能唔知，屋宇署過去三年曾經接獲關於劏房嘅投訴四千四百宗，到頭來只係發出七十三份清拆令咁大把。

計功夫茶話齋，劏房固然要清拆，整體房屋政策都要認真檢討，諗辦法安置住唔起正常單位嘅窮苦大眾。一個以民為本嘅政府冇可能忍心睇住小市民蝸居貧民窟，日日提心吊膽憂慮火燭變燒豬！