管治無力百花殘　樹毀人亡事事煩

古樹名木冊之中有一棵碩果僅存嘅「爪哇決明」，位於香港動植物公園，如果健健康康正正常常，係會令小市民覺得如詩如畫嘅，事關爪哇決明開出繁花似錦，一串又一串粉紅色花朵簡直好似傾盆大雨咁蔚為奇觀。所以咯喎，爪哇決明嘅英文名係Pink Shower Tree。

之但係咁，負責管理嘅康文署話喎，呢一棵爪哇決明健康未如理想，踏入風季已加強護理，將會尋求專家意見，暫時未有移除行動。

長春社總監蘇國賢係咁講嘅，前年曾以康文署專家小組成員身份研究爪哇決明，樹木當時有真菌入侵現象，有專家建議移除，不過由於情況未算太嚴重，所以最終得以保留。兩星期前再探望古樹，發現情況的確不樂觀而且不理想，惟有以繩索固定。由於樹身主幹下半部有樹皮脫落，樹幹疑似生瘤，所以康文署張貼警告，呼籲途人切勿靠近。

唉，好地地一棵爪哇決明，因乜解究淪落到奄奄一息嘅田地？要揭開呢一個病樹之謎，不如咁嘞，先睇睇一筆糊塗帳。

近年發生多宗包括殺人之冧樹事件，其中一宗事後揭露康文署職員勘察樹木原來係極度兒戲粗疏。該署職員事發前多次去事發斜坡工作，竟然未發現存在樹洞、傷口、裂縫、枯枝以及不當切割等等五大影響結構嘅元素。職員仲有一項能人所不能嘅特異功能，居然可以喺短短四個半小時之內巡查一萬七千棵樹，人哋一目十行，佢哋一目十樹。

正所謂咯喎，一葉落而知秋，計功夫茶話齋，一樹塌而知醜。試問四個半小時之內巡查一萬七千棵樹，有乜辦法唔睇漏眼？官僚嘅醜態就係敷衍塞責，終於累人累物累街坊。既然康文署驗樹係咁兒戲，又既然一葉落而知秋、一樹塌而知醜，香港動植物公園呢一棵爪哇決明嘅病因呼之欲出啦，之唔係監管失職囉！

講開一樹塌而知醜，其實一次又一次嘅樹毀人亡事件已經足以反映，本地官僚嘅獻世表現係何等醜陋。財爺派錢派到天怒人怨，最近嘅僭建風暴揭發，居然連一眾高官包括曾蔭權在內都知法犯法，你話吖，七一遊行有乜可能唔係群情洶湧？管治無力百花殘，樹毀人亡事事煩，你又真係好難怪今年七一遊行嘅口號係「曾蔭權下台」！