咦，街知巷聞出晒名反中亂港嘅淫賤黎三度「反攻大陸」，居然次次都成功搶灘，有冇搞錯呀？天理何存呀？
如果大家唔明乜嘢叫做反攻大陸，咁就等功夫茶講解一下啦。淫賤黎第一次反攻大陸嘅武器係壹淫媒旗下刊物，大字標題「天滅中共」嗰隻，名義上違禁嘅不良刊物通街都有得賣。第二次反攻大陸用嘅武器就係非法六合彩報，長年累月走私北上荼毒病態賭徒，國內同胞因此而家破人亡者不知凡幾。至於第三次反攻大陸咯喎，簡直勁到冇朋友，所用嘅武器正正係淫賤黎自己，勁過恐怖分子常用嘅人肉炸彈。
即係咁，今年四月珠海出版社發行一本名為《我是黎智英》嘅書，一本由淫賤黎親筆撰寫嘅爛鬼自傳，公然推出市面發售。好嘞，問題係，淫賤黎身為一股賣國求榮嘅反動力量，因乜事幹可以大搖大擺喺神州大地出版自傳？圖利都尚在其次，最緊要係淫賤黎嘅思想行為永遠與國家為敵吖嘛，辱罵國家領導人可以連珠炮發狂鬧十幾句「王八蛋」，搞乜鬼竟然可以如入無人之境散播惡言惡行？
如夢初醒嘅廣東省新聞出版局人員係咁講嘅，該書仍在審批中，根據法例不可市面出售，當局會採取進一步行動。至於係乜嘢行動呢？對方就話嘞：「這是不方便公開透露的事情。」
唉，計功夫茶話齋，一係有人嚴重失職，一係有人蓄意放生。港區全國人大代表黃國健講得啱呀，甚至涉嫌受賄，當局必須徹查。
諗諗下，既然淫賤黎三度反攻大陸都成功，不如咁嘞，一不做，二不休，索性玩鋪大嘅。點樣玩呢？大漢奸李柱銘又可以出自傳啦，然後內地熱銷，宣揚如何賣國；長毛梁國雄又可以出自傳啦，鼓吹如何將茉莉花革命搞到遍地開花；台灣之恥陳水扁又可以出自傳啦，散播台獨言論。即使已不在人世嘅民族敗類都可搵人幫佢哋寫自傳㗎，左一本汪精衞自傳，右一本吳三桂自傳，賣國成風，蔚為奇觀。唔好唔記得非我族類都可以喺偉大祖國出自傳喎，日本嘅東條英機同樣可以出一本《我在南京屠城的日子》，等讀者睇到眉飛色舞。
嗱嗱嗱，功夫茶仲有一個好主意，內地書店乾脆設立「漢奸走狗賣國賊專區」，販賣五花八門導人向惡嘅自傳，方便讀者按圖索驥尋找「天滅中共」嘅武林秘笈。
講到尾，北大人中門大開任得淫賤黎接二連三反攻大陸，等於引賊入屋嘅啫，情況同當年吳三桂引清兵入關冇乜分別㗎咋。咦咦咦，照咁講，貪官污吏咪一樣係漢奸賣國賊？該煨咯！