公義無法彰顯，沉冤不能得雪，六月居然冇飛霜真係天冇眼！
咦，功夫茶係咪講緊維權藝術家艾未未被失蹤事件呢？非也，內地維權人士不斷被打壓固然係痛心疾首，不過今日要同大家研究嘅係另一單案件，一單本地風化案。案情其實好簡單，十三歲韓籍男童舊年喺東區醫院性侵犯一名五歲嘅同房女童，被告承認非禮罪，法官判入感化院。
大家一定會問，明明係性侵犯，因乜事幹變咗非禮？關鍵問題就喺呢度嘞，連法官大人都忍唔住開聲，批評現行法例不合時宜。原來自詡法治之區嘅香港有一項非常之咁戇居嘅普通法推定，就係假設「十四歲以下男童無性交能力」。由於侵犯五歲女童嘅色魔只有十三歲，所以控方無論如何都唔可以控告佢強姦，而法官又必須以強姦以外嘅罪名判決，到頭來就變成輕得多嘅非禮，完全冇辦法以較重嘅刑罰將佢收監。法官都覺得好無奈㗎，雖然嚴厲斥責被告行為令人惡心，之但係礙於法例所限，惟有退而求其次判佢入感化院。
呢嗱嗱嗱，你話係咪戇居吖？莫講話十三歲絕對有心有力，功夫茶相信十二歲已經血氣方剛，特區政府居然食古不化，抱殘守缺假設十四歲以下全部都係性無能，卒之累到受害女童以及家屬無法討回公道，呢啲咪就係沉冤不能得雪囉！
東區醫院又係戇居嘅，大概亦係以為十三歲男童性無能啩，竟然男女混合安置一間病房，結果令到一位小妹妹慘遭蹂躪。男女混合都算嘞，院方全無監管簡直係助紂為虐！
後知後覺嘅保安局事後孔明咁話，法律改革委員會去年十二月提出，建議廢除十四歲以下男童無性交能力嘅普通法推定，政府認為建議值得支持，而且社會上未有引起爭議，保安局會修訂法例，落實法改會建議，廢除相關推定。
唉，功夫茶強烈懷疑保安局患上腦退化症，試問有邊一次唔係遲鈍到爆大鑊先至識做嘢，即使做嘢都做到甩甩漏漏？泰國騷亂遲遲唔派包機救人，中東革命遲遲唔發旅遊警示，日本地震係就係有發旅遊警示，不過涵蓋範圍唔包括隨時殃及池魚嘅鄰近地區。
對於法改會嘅建議，社會上梗係冇爭議啦，事關十四歲以下男童犯強姦罪已經唔係第一次，一早就反映法例過時。如果你反對廢除相關法例，你一定係十四歲以下準備犯案嘅小色魔。
咁講啦，唔該保安局做番一齣好戲，盡快廢除違反人類生理結構嘅戇居法例，一來彰顯公義，二來嚇窒色魔。喂，你唔去保赤安良，有乜資格叫做保安局呀，大老爺！