僭建風暴愈吹愈勁，高官政客紛紛中招。達官貴人其身不正，明知單位涉及僭建都唔做嘢，固然不可饒恕，而漠視斜坡維修，將一己私利凌駕公眾安全之上，更加唔可以忍受。
真係講都冇人信，申訴專員黎年啱啱被踢爆未有修葺住所斜坡，咁快又有其他權貴中招，呢次輪到行政會議成員史美倫，身為壽山村道駿園業主立案法團主席嘅佢，被揭發漠視斜坡修葺令。
事緣史美倫○九年十月收到屋宇署向法團發出嘅修葺令之後，一直闊佬懶理，拖到依家都冇修葺。佢回應話，法團正籌劃緊修葺工程，而屋苑管理處就以「維修工程較複雜」做擋箭牌，又話四月份已經將修葺建議交咗畀屋宇署喎。
權貴畀人踢爆醜聞，例牌攞一大堆理由為自己辯護，所以，大家對史美倫嘅解釋毋須奇怪，要怪就怪港府執法不力，淪為無牙老虎。呢幅面積近五千平方呎嘅斜坡，○八年曾發生山泥傾瀉，好彩冇人傷亡。事後土力工程處做過緊急鞏固工程，但認為斜坡有機會局部甚至整幅倒塌，建議屋宇署限令法團七個月內提交補救工程建議，點知法團完全當屋宇署冇到。
史美倫貴為行政會議成員，應該知道拖延修葺可能出現嘅嚴重後果，更應該明白有法不依等同犯法嘅道理㗎，佢冇以身作則不特已，醜聞被踢爆後仲諸多狡辯，簡直豈有此理！
無獨有偶，同教育局局長孫明揚豪宅嘅僭建醜聞如出一轍，駿園亦因為唔理斜坡修葺令而被釘契。身為屋苑業主立案法團主席嘅史美倫居然無動於衷，唔通香港地真係有錢大晒？
斜坡安全關乎人命，負責監管嘅屋宇署似乎一啲都唔着緊，署方淨係證實當年曾經發出過修葺令，又話會監察工程進度喎。喂，兩年前發出修葺令，依家仲未動工，咁叫做監察呀？老實講喇，如果唔係傳媒窮追猛打，呢件事咪又係不了了之。
呢，屯門日前發生恐怖冧簷篷傷人事故，屋宇署事後被揭發，早喺九七年已經兩度發出修葺令，要求大廈業主委任認可人士檢查簷篷結構穩固程度，但之後就關人個關，一直冇跟進。直至出事之後，署方至話會對全港約四千幢建有同類結構簷篷嘅樓宇進行特別巡查喎。唉，賊過興兵，遲唔遲啲吖！
咪話功夫茶唔提醒，雨季將至，如果當局唔吸取教訓，加強巡查，嚴格執法，僭建物又好，危險斜坡又好，只要發生任何意外，都隨時令港府管治威信徹底崩潰呀！