孔夫子話：後生可畏。其實，今時今日嘅後生仔，可畏程度比孔子年代有過之而無不及，真係好鬼得人驚㗎！
呢，又有「學校小霸王」橫行嘞。一名乳名亮仔嘅十歲男生報稱經常遭一名同班男同學毆打，長期淪為人肉沙包。日前上午放小息，學校小霸王疑因索取餅乾被拒，又對亮仔逞兇，拳打腳踢十幾分鐘，亮仔臉部同右腿被打瘀受傷。亮仔母親見兒子滿身傷痕，向校方了解情況，驚覺事態嚴重，決定報警求助。
據亮仔講，學校內人肉沙包唔止佢一個，好多同學仔都受過小霸王虐打。亮仔憶述時猶有餘悸咁話：「佢好鍾意打人，班同學都有好多人被佢打過。」嘩，小學生惡過惡霸，咁搞法，香港咪遲早變《罪惡之城》？咁仲成世界嘅？
嗱嗱嗱，唔係功夫茶杞人憂天呀，香港青少年犯罪有年輕化趨勢，已經係眾所周知嘅事實，唔止有小惡霸，仲有小色魔添。法庭前日先至審完一宗駭人聽聞嘅青少年風化案，犯案人係一名十三歲韓籍男童，舊年喺東區醫院性侵犯五歲大同房女童，但因為本港嘅戇居法例假設「十四歲以下兒童無性交能力」，法官只能判被告入感化院。
唉，小小年紀已經色膽包天，唔怪得連法官亦批評本港法例不合時宜，必須盡快修改。其實，計功夫茶話齋，何止法例過時必須修改，香港嘅教育制度更加需要檢討啦，如果唔係教育制度失敗，點會小小年紀就變成惡霸，喺校園橫行無忌欺凌弱小？點會小小年紀就淪為色魔，光天化日之下喺醫院病房犯案？
養不教，父之過；教不嚴，師之惰。青少年問題多多，唔使問阿貴，實係教育制度出咗問題喇。所以咯喎，教育局實在有必要自我檢討，快快諗計強化學生嘅品德教育。係呢，教育局咪打算將德育及國民教育列為中小學必修科嘅，計功夫茶話齋，國民教育慢慢搞都唔遲，但品德教育就唔可以再拖喇，如果唔係，香港第日周街都係小惡霸小色魔，咁就該煨咯！
話時話，香港回歸十四年，教育制度簡直一塌糊塗。當局好大喜功，一味搞搞震，教育改革搞到天翻地覆，三日一小改，五日一大改，沒完沒了，改到學校疲於奔命，改到教師頭昏腦脹，改到家長無所適從，改到學生天旋地轉。試問咁失敗嘅教育政策，又如何培育優質下一代呢？香港投放教育嘅資源年年增加，但係教育質素就每況愈下，簡直係香港嘅羞恥，要救香港青少年，首先就要捉班高官去接受品德教育！