香港人平均壽命名列世界前茅，可惜長壽未必係福，唔少打工仔愈臨近退休愈心慌，慌乜嘢？慌日後無依無靠，臨老唔過得世咯。
老有所養變咗老有所憂，簡直係香港嘅恥辱，但係港府高官若無其事，一啲都唔覺得醜怪，對社會上要求推行全民退休保障計劃嘅呼聲充耳不聞，詐傻扮懵。勞工及福利局局長張建宗話喎，坊間提出嘅全民退休保障涉及三方供款，存在好大問題，短期難達共識。
奇怪嘅係，港府一貫作風係事無大小都要「研究」、「諮詢」一大輪，點解唯獨全民退休保障計劃連研究同諮詢都唔做，就一口拒絕呢？
查實港人對全民退休保障計劃早有共識，多數人都話支持，甚至有人話，為咗晚年可以有尊嚴咁生活，就算加少少稅都可以接受。張建宗話社會冇共識，簡直係擘大眼講大話。
港府唔考慮全民退休保障計劃，咁又有乜嘢辦法呢？張建宗偷樑換柱，又再兜售所謂保障市民退休生活三大支柱，包括強積金、個人儲蓄及社會保障，仲送多個強積金「優化版」，建議將入息供款下限提升至六千五百蚊。
不提猶自可，一提強積金就把幾火。呢個政府孤寒到冇朋友，對養老護老安老一啲承擔都冇，公僕可以享受退休保障，打工仔退休卻要食自己，唔嬲就假。更離譜就係，強積金管理費超貴，打工仔退休後七除八扣可能得番雞碎咁多，供款人變相幫基金經理打工，安享晚年？諗都唔使諗。所謂優化強積金，根本係換湯唔換藥，問題一樣冇解決，簡直係搵笨。
港人老無所養，問題根源係港府唔肯承擔。強積金固然唔湯唔水，基層打工仔餐搵餐食餐餐清，靠個人儲蓄養老根本就係天方夜譚，而社會保障覆蓋範圍有限，冇幾多人可以受惠。可以話，所謂三大支柱就好似生蟲拐杖咁，完全靠唔住。
大家有眼睇，本港孤苦伶仃、無依無靠嘅長者比比皆是。有長者難忍飢餓，要打劫便利店博坐監食皇家飯；有長者七老八十仲要揸小巴搵食，卒之累死喺工作崗位；而靠執紙皮謀生嘅長者，更加通街通巷都係。唉，有頭髮邊個肯做癩痢吖，如果有足夠嘅退休保障，呢啲悲劇根本唔會喺香港呢個所謂國際都會發生。
港府坐擁金山銀山，如果真係以民為本嘅，大把嘢可以做。全民退休保障計劃連研究都慳番，高官諗住拖到夠鐘收工，將呢個爛攤子留畀下屆政府去收拾，自己關人個關。計功夫茶話齋，呢個政府豈止安老失職，直頭係虐老！