港府蝸牛版派錢方案終於出爐，大家打算點用呢六千蚊呢？香港人向來愛心爆棚，知道施比受更有福，所以，可能有唔少人會將呢筆錢捐畀慈善機構。之不過咁，行善都要帶眼識人，小心嗰啲慈善祈福黨呀！
嗱嗱嗱，功夫茶唔係一竹篙打晒一船人，所謂樹大有枯枝，族大有乞兒，本港籌款活動一向無王管，以致漏洞多多，亂象叢生，唔係嘅話，法改會都唔使補鑊，推出規管諮詢文件啦。法改會嘅重點建議係咁嘅，設立慈善事務委員會統一規管所有慈善組織，又規定進行公眾籌款嘅慈善組織必須註冊，並每年提交財務報告。咁都不特止，法改會仲建議，規管近年盛行嘅職業籌款人，同埋限制搵長者進行街頭募捐活動。
話時話，法改會呢份諮詢文件都算姍姍來遲咯，○七年開始話規管慈善籌款活動，拖到依家先至有方案出台，仲要到九月諮詢結束再提交最後報告。學社福界議員話齋，以港府凡事歎慢板嘅作風，搞得嚟曾蔭權政府都收工啦！
功夫茶想同大家講嘅係，呢個世界有樣嘢叫逆向思維，假如你返到內地，見到路邊大大個牌寫住「創建文明城市，爭當文明市民」，咁你就要小心喇，特別要袋穩個銀包。同樣道理，如果你詳細睇吓法改會份諮詢文件，就可以估到現時本港嘅慈善籌款活動亂象一籮籮，漏洞何其多啦。
呢，全港現時有六千間按《稅務條例》營運嘅慈善機構，每年總籌款額高達八十億元，之但係懶散官僚竟然放任唔管，並無規定機構必須對外披露善款去向。即係話，市民捐出去嘅錢係咪用得其所，有冇畀人中飽私囊，根本無人知。
更騎呢嘅係，根據現時寬鬆到無倫嘅法例，阿貓阿狗都可以掛個慈善招牌出嚟四出募捐，若然有恐怖組織藉呢個漏洞喺香港籌集資金，市民好心行善，咪隨時變咗恐怖分子嘅幫兇？大家咪怪功夫茶多心，呢，早前發生嘅港人社工淫辱雲南稚女案，就係利用孤兒院嘅慈善招牌為非作歹啦。
所以話啫，長此下去，真係令人擔心香港慈善事業發展㗎，大家都聽過「劣幣驅逐良幣」㗎啦，慈善機構良莠不齊，真假難分，香港人雖然有善心啫，但一諗起可能送錢畀祈福黨，明明想捐錢都會停一停、諗一諗啦，係咪？
俗語話，遲到好過無到。當局終於肯出招規管慈善籌款活動，點都好過乜都唔做，不過，功夫茶想提醒班官僚，一係唔做，要做就做好啲，唔好又做到半桶水，甩甩漏漏呀。如果唔係，就算香港人幾有愛心，都遲早畀你哋班酒囊飯袋累事！