一場僭建風暴徹底暴露中國人劣根性，得寸必然進尺，得一必然想二，風涼水冷三層村屋仲嫌唔夠喉，硬係要無中生有加建多一層甚至幾層。以為做到大官就識得收斂避嫌？錯嘞錯嘞，大錯特錯，事關大官流嘅血同樣充滿自私基因，即使貴為特區之首依然同土豪惡霸冇乜分別，唯一唔同嘅係部分新界鄉紳聲大夾惡要求「僭建合法化」，而曾蔭權極其量只敢砌詞狡辯，未至於無恥到爭取「拆僭建賠償」。
僭建風暴被本報記者揭發終極醜聞，煲呔曾祖屋都僭建，露台居然密封，再加上長過水蛇春嘅達官貴人僭建名單，取締僭建係咪應該雷厲風行呢？理論上當然應該啦，冇可能任由呢一班貪婪權貴將中國人劣根性發揚光大吖嘛。之但係非常之咁不幸，發展局局長林鄭月娥原來係一個口噏噏當秘笈嘅忠實粉絲，把口話嚴打僭建物，隻手就縮到失咗蹤。功夫茶有少少懷疑，林鄭局長其實暗中維護權貴既得利益，否則冇可能執法乏力到好似一條軟皮蛇。
唔係功夫茶老屈㗎，數字說明一切。屋宇署最新數字顯示，今年四月發出一千一百幾張僭建物清拆令，比去年同期少咗一半，與前年五千多張比較，只佔少得可憐嘅兩成。除咗清拆令不增反減，勸喻信亦係寥寥無幾，屋宇署今年四月只發出百幾張勸喻信，遠低於去年同期嘅接近六百張。檢控數字又點呢？今年四月屋宇署發出近二百張傳票，少於前年同期嘅三百幾張。
難怪立法會議員陳淑莊表示失望，認為屋宇署應該清楚交代打擊僭建物政策，例如教育局局長孫明揚嘅單位被釘契多年仍未清拆僭建物，仲有幾多同類「千年老釘」個案。
唉，又話林鄭月娥「好打得」嘅？因乜事幹見到僭建成風居然表現得弱不禁風？呢嗱嗱嗱，千祈唔好同功夫茶講，林鄭局長怕咗土皇帝一樣嘅新界鄉紳呀，如果係咁功夫茶真係會認真考慮買一幢三層高村屋再增建為十八層o架！
至於林鄭是否暗中放生僭建俱樂部嘅一眾達官貴人，呢家嘢確係瓜田李下嫌疑甚大。你知啦，當年屋宇署都唔敢向上司孫明揚大大聲聲勒令「拆你屋」，林鄭月娥口講嚴打實則輕饒，絕對符合面面俱圓嘅為官之道。
不如咁啦，功夫茶公開挑戰林鄭月娥，如果閣下真係好打得，麻煩拿出實際行動全面清拆僭建物，包括達官貴人嘅霸王物業，否則咯喎，好打得呢一塊招牌同樣係僭建物，必須自行清拆！