加價加價，百物騰貴之下乜鬼都話加價。呢嗱嗱嗱，加完又加嘅東區海底隧道再次申請加價，幅度仲要高達四成二！
香港嘅交通費點解會貴得咁離譜嘅呢？其中一個原因係「收買路錢」獅子開大口「食人隻車」。功夫茶計過數，二三十年前搭巴士最普遍嘅收費係三毫子，當時打工仔月薪大概千幾二千銀，今時今日咯喎，巴士費郁啲都要十皮，升幅三十倍以上，試問打工仔收入有冇增加三十倍至六萬元呢？梗係冇啦，否則唔會咁多蝸居一族埋怨「希特拉都買唔到樓」！
東隧公司唔係冇錢賺㗎，去年盈利就超過四億元。之不過咁，佢哋話喎，盈利未達到合理回報率百分之十五，所以去年八月申請加價賺到盡。唔使問啦，瘋狂加價一定激起民憤。可能怕犯眾憎啩，所以行政會議好大機會否決加價申請。問題係，否決加價申請唔代表安枕無憂，事關東隧公司有權提出仲裁，一旦勝訴就可以落實加價，而且加幅可能更誇張。唯一好處只係，透過仲裁爭取加價一般需時三年。換言之，政府死拖爛拖，拖三年先至畀東隧如願以償向司機搶錢。
唉，講到呢度功夫茶真係有恨鐵不成鋼嘅感慨，堂堂一個政府居然冇辦法紓解民困，任得隧道公司魚肉市民，納稅人年年交咁多稅究竟係為乜嘅呢？「以民為本」嘅管治承諾到底係咪發噏風？
除咗東隧之外，五條離島渡輪航線下月一日又要加價。之但係劇情峰迴路轉，長洲街坊會主席郭卓堅入稟高院申請司法覆核，要求推翻中環往來長洲航線嘅加價決定。入稟理據係咁嘅，長洲街坊會舊年十一月二十二日去信曾蔭權，就渡輪假日收費提出意見，運輸署其後代曾蔭權回覆，答應將假日與平日票價差距收窄，由原本四成減至兩成以下。郭卓堅透露：「當時所有街坊聽到有關消息都十分高興，部分食肆又更換煮食器皿，迎接新一個遊客高峰期。」作死佢吖，運輸署三月宣布離島渡輪航線票價加幅，長洲線假日與平日票價差距竟然超過四成，長洲居民聽到呢一個晴天霹靂嘅噩耗簡直有如跌落萬丈深淵！
喂喂喂，你知啦，長洲居民大部分依靠旅遊業維生，渡輪航線加價等於趕客啫，你叫人哋點樣搵遊客錢呀？最可惡嘅係曾蔭權，明明承諾將假日與平日票價差距收窄，結果居然係呃鬼食豆腐，搞到長洲居民由滿心期望變成極度失望。
百物騰貴乜都加，管治承諾乜都假，曾蔭權民望唔衰過董建華舊時都冇天理啦！