僭建風暴擾攘咗咁耐，「好打得」局長林鄭月娥出招嘞，針對新界村屋僭建問題，呢一位發展局局長公布處理方案。
方案內容大概係咁嘅，首階段優先取締較高風險物體，包括四層或以上嘅村屋，覆蓋天台面積超過一半嘅圍封式建築物，以及冇獲得政府批准興建嘅房屋。至於十一類被定義為風險較低嘅僭建物，包括覆蓋天台不多於一半嘅搭建物，冇圍封嘅天台構築物以及廣告招牌等等，業主只要喺指定日子之前向屋宇署登記，提交僭建物嘅相片、描述、大小同建成日期，並且委聘合資格人士定期檢查，證明安全就毋須即時清拆。林鄭月娥係咁講嘅，以登記制度暫緩對新界村屋僭建物執法，並非將村屋僭建合法化，不存在特赦，亦非一刀切。局長仲話，屋宇署蒐集詳細資料之後，將會因應實際情況制訂適當行動。
表面上好似講到幾合情合理，之但係咁，乜嘢叫做「暫緩執法」？暫緩到何年何月？大家唔好唔記得，其身不正嘅曾蔭權祖屋僭建，暫緩執法咗好多年㗎喇，如果唔係本報踢爆，睇怕家陣都冇人取締。仲有仲有，教育局局長孫明揚又係僭建，即使釘咗契照樣闊佬懶理，咪又係暫緩執法嘅結果囉！
講到呢度，實在有必要重溫一下僭建風暴係點樣形成嘅。申訴專員黎年發表報告，狠批政府部門長期漠視新界村屋僭建問題，搞到三尖八角怪獸屋遍地開花，一拖就拖咗十幾二十年。換言之，暫緩執法已經係上世紀延續落嚟嘅管治作風。舊債未清，新債免問，今時今日仲要暫緩執法？咪玩啦，好打得局長！
立法會房屋事務委員會主席李永達就講得啱嘞，佢批評有關嘅登記制度其實係「半特赦」。李永達又質疑，林鄭月娥向鄉議局「跪低」。局長姐姐當然唔會承認跪低，不過可惜吖，新界鄉紳又確係咄咄逼人，難免惹人遐想。鄉紳一來唔肯拆屋，二來反客為主揚言包圍立法會抗議。喺咁嘅情況之下居然出現「半特赦」，你話唔係跪低都冇人信啦。
唉，講來講去都係弱雞政府半桶水，做事永遠拖泥帶水。其實解決僭建問題有幾難先？法例係咁就係咁，你揸正嚟做咪得囉，唔通垃圾蟲夠惡就唔使罰呀？莫非醉酒駕駛又可以暫緩執法？僭建關乎香港人最敏感嘅房屋需要，你變相送人半層樓，蝸居一族睇見都眼火爆啦！
計功夫茶話齋，拖得就拖絕對唔係好打得嘅表現，極其量只係「好耍得」。