恭喜恭喜！賀喜賀喜！國家文化部終於批准，將「大澳端午龍舟遊涌」列入第三批國家級非物質文化遺產名錄！
所以咯喎，大澳昨日歡天喜地，大批遊人蜂擁而至欣賞端午龍舟遊涌。最歡喜嗰個應該係民政事務局局長曾德成，佢老哥好驕傲咁話，○九年九月向國家文化部申報大澳端午龍舟遊涌、長洲太平清醮、香港潮人盂蘭勝會以及大坑舞火龍列入國家級非物質文化遺產，經過專家認真評審同科學認定，香港四個申報項目全部申報成功。
大澳端午龍舟遊涌到底係點嘅呢？不如等功夫茶同大家簡略介紹。呢個傳統有百幾年歷史㗎嘞，以前大澳漁村發生瘟疫，漁民迎接各廟宇神像巡遊水道，希望驅除瘟疫，果然靈驗無比。農曆五月初四端午節前夕，三個漁業行會成員前往四間廟宇請出神像，由「神艇」接返供奉祭祀。端午節早上，漁業行會成員將龍舟扒到楊侯廟後寶珠潭山邊採集青草放入龍口，稱為「採青」，再以雄雞血混白酒灑到龍頭、龍尾同船身，稱為「喝龍」。然後就係「遊涌」，由龍舟拖住載有神像嘅小艇巡遊水道，沿途焚燒金銀衣紙，祈求合境平安。遊涌之後，龍舟競渡，皆大歡喜。
功夫茶絕對唔反對將咁有歷史價值嘅傳統列作文化遺產，之但係難免憂心忡忡，德成局長有冇決心同魄力做好保育工作？你知啦，港產官僚出晒名唔識保育，任何遺產交到官老爺手上硬係令人覺得危危乎。
嗱嗱嗱，淨係舉兩個失敗例子吖。曾經有富豪想將香港後花園西貢大浪西灣私有化，大興土木破壞自然生態，政府居然傻更更後知後覺，傻到甚至唔知現場原來一早被列作考古遺址。至於第二個例子，舊年七月一場黑雨搞到大埔碗窰村毀人亡，原來當地係擁有幾百年歷史嘅製窰工場，被認定係中國境內唯一保存完整嘅窰場，早於一九八三年被列作法定古蹟，可惜三十年來毫無管理，古物古蹟辦事處保護不力，一場黑雨將大量珍貴文物沖落山腳底。
盂蘭勝會同樣列作文化遺產，點睇呢？記得研究盂蘭活動多年嘅導賞導師張熙明講過，盂蘭勝會規模不斷縮小，甚至有人將傳統唱大戲改唱流行曲，做足全套盂蘭勝會儀式嘅團體寥寥可數，擔心政府推廣不力而導致岌岌可危。
即係咁，龍舟文化誠可貴，港官保育實閉翳。德成局長麻煩以實際行動釋除疑慮，否則咯喎，損害國家形象好大罪㗎，隨時被失蹤都有之！