教科書年年漲價，書商賺到盆滿缽滿，學生家長就不堪負擔，每逢新學年買書開學都叫苦連天。政府於是要求出版商將教科書與教材分拆定價，話要減輕學生家長嘅經濟負擔。
呢個諗法確係唔錯嘅，可惜書商根本唔賣帳。嗱，尋日公布新學年教科書售價，中小學課本當中只有百分之八將教科書同教材分拆定價。分拆後，課本價格只減咗雞碎咁多，而以前免費提供嘅教師用書唔單止要收費，仲貴到飛起，冇分拆嘅課本就大幅加價三到五個巴仙。書商擺明當政府冇到，一於掠水到底，問你服未！
政府大鑼大鼓推出分拆大計，到頭來得個吉。講到底都係因為教育局閉門造車，冇摸清市場形勢，有乜法子唔撞板！
教育局班高官真係冇腦，佢哋以為將教材分拆咗，就可以降低課本價格，其實只係一廂情願。事關本港教科書市場根本就畸形到極，學校揀書唔問價，家長只出錢無權揀書，定價大權喺晒書商手上，佢哋話加價就加價，政府反而要低聲下氣求佢哋「合作」。呢，分拆教材計劃本來應該舊年推出嘅，但書商話要處理版權問題，就推遲到今年。今年書商又話當日根本同政府冇共識，要由明年起三年內先至將課本同教材全面分拆定價。激到教育局班高官生蝦咁跳，大鬧書商出爾反爾，拖得就拖。
係呀，書商係講咗唔算數呀，政府又可以將佢點啫？就算全面分拆又有乜用？書商照樣可以隨時改版，或者利用成本上升等等藉口企硬唔減價，政府咪又係冇符。堂堂特區政府被出版商玩到謝，話唔係跛腳鴨都冇人信啦！
非不能也，是不為也。其實早就有人建議，由政府統籌，透過招標限制課本嘅價格。咁做本來唔難，因為教科書本來就要由當局審批至可以出版，加多一項價格管理咪得囉。可惜教育局食古不化，一味話香港係自由市場經濟，當局唔可以干預價格喎。之不過，教科書唔係一般商品，關乎成千上萬學生嘅學業同前途，政府點可以翹埋雙手，將責任推晒畀唯利是圖嘅書商o架！等收工都唔使咁吖！
面對咄咄逼人嘅書商，教育局高官聲言，如果書商一年後仍然拒絕將教材分拆定價，教育局到時就會招標出版課本同埋教材，為市場引入競爭。照咁講，政府終於硬起嚟嘞，問題係，硬就要硬到底，講咗就要做，唔好再令市民失望。