鬍鬚曾常藉網誌抒懷，愛拋書包，有時洋書包，有時中國式書包，充分表現佢活在一個華洋雜處的社會，唔怪得佢愛劍擊，亦愛詠春。不過，佢亦經常亂咁拋書包。今年初，佢份空洞無一物嘅財政預算案一出，劣評如潮，預算案辯論被議員狂插，佢九唔搭八，喺網誌引馬克吐溫來遮醜，為自己建下台階，馬克吐溫嘅經典名言係：「若我們都思想一致，則大為不妙，只有意見不同，賽馬才會出現。」
好喇，老朽並非腦退化而愛「話說當年」，但係佢最近篇網誌又亂拋書包話：「在過去兩星期，我注意到社會上有不少揣測，部分輿論的評論，亦由指摘政府坐視不理，轉為要求政府不可落重藥。這種朝三暮四的說法使我感到大惑不解。」同文張志剛已力斥其非，不贅。
老朽想指出，鬍鬚曾「應該出手就出手」，但樓市年初已熾熱，你反應遲鈍，如今一出手又太狠，打擊炒家卻誤傷了用家，分分鐘「殺錯良民」，搞到真正想置業安居的市民一頸血，明明係急就章，卻反指批評者「朝三暮四」。你上次唔夠人講，搵馬克吐溫過橋，說「若我們都思想一致，則大為不妙」；如今，只不過有啲「人人言殊」（鬍鬚曾喺網誌《冰與火：緊縮與寬鬆》自鑄新詞，太史公原句係「言人人殊」），佢咁都容納唔到，咁鬼冇器度，唔怪得在理財上一啲進步都冇。香港上百萬窮人，睇怕要信耶穌才可得「水牛」矣！
作為財金高官，應察納雅言，耳聽八方，不要把批評者當成打擊、誣衊，高官們，有批評才能夠讓你們更加正確地做事啊！