施政報告最大的特點便是扶貧無力，安老無心，「置安心」更是好睇唔好食，等得嚟都蚊瞓，為咗儲首期，唔去玩唔飲茶，屆時樓價又飆升，你想置番層「實而不華」的樓又泡湯，咁搞法人會癲心會酸。要幫夾心階層置業，立竿見影、「實而不華」的施政就係復建居屋，何必要折磨中下層市民？「置安心」正應了阿里巴巴集團董事會主席馬雲的名句：「說起來全對，做起來全錯。」
施政報告經不起刨根問柢，市民初步消化各項具體措施後，便看出政府「冇誠意、冇承擔、等同搵笨」。回歸以來，外匯及財政儲備激增至兩萬多億元，政府水浸，卻搞出一百二十六萬窮人，「關愛基金」又唔肯一力承擔，令人莫名其妙，政府自己捉蟲，實在怪不得人。就算一百億元「關愛基金」政府自己畀晒，相對兩萬多億元外匯及財政儲備實在是九牛一毛，何必節外生枝？
仁民愛物、同舟共濟並非靠吹。眾所周知，經商講的是貨真價實，童叟無欺；行醫講的是仁愛之心，命比錢重；為人師表，教育講的是真才實學；至於從政，講的是一諾千金，取信於民。如今，市民卻見到政府講一套做一套。
不是嗎？連放寬生果金也要斤斤計較，係都要老人回港居住兩個月，才可得雞碎咁多嘅全年生果金，這不是瞎折騰是甚麼？
市民對施政報告的滿意率插水，反應實屬正常，皆因政府未能攞個心出嚟，浮誇治港，一味吹噓「六大優勢產業」，自欺欺人，總之吹起一個又一個繁華的泡沫。