一早醒來，由觀塘的家到工作地點的東區，空氣污染指數都係勁爆嘅五百，老朽恍似一隻烏鴉，由墨西哥飛到非洲的黑森林，總之，整日在黑暗中尋找光明，就是看不到自己的身影。原來沙塵暴咁鬼恐怖，令人迷失香城。可恨上至環境局，下至天文台，完全後知後覺，搞到老朽哮喘一發不可收拾。
最好笑係天文台，狂風沙來時，仍然預測本港吹東風，情況將有所改善。唉！如果孔明信佢，借錯風，唔死一身孱。周瑜信佢，「東風不與周郎便，銅雀春深鎖二喬」，大小二喬就成為曹操之「玩伴」矣！之不過環保署仲戇居，凌晨兩時才發新聞稿，真係搵鬼睇咩！嗰位環境局局長淨係識叫人停車熄匙，改搭公共交通工具，早響啊！邱局長，老朽車在「看不見的城市」耍盲雞，哮喘發作，盤軚左擰右轉，險象環生，邱局長，老朽平時對你都算小罵大幫忙，為何你咁大整蠱？
據悉本港地下天文台一眾氣象發燒友，早幾日已察覺到沙塵暴將襲港，而堂堂政府部門的預報機制，竟連業餘組織也不如。邱局長，我勸你一係退下來，一係冧掂煲呔曾，將呢班業餘天文玩家，全部編入副局長或政治助理，佢哋真係幫到你㗎！
天文台水皮，更不是新聞。擅寫廣東打油詩的廖鳳舒，曾有詩揶揄南京天文台「水皮」，詩云：「報風報雨報埋煙，日本人稱大話團。寒暑表真多事件，測量器便係神仙。擋雷機着雷嚟劈，得月樓啱月未圓。隔海宋皇台咁遠，搬嚟呢處想摩天。」
全詩令人發笑，尤其頭兩句，日諺謂撒謊為天文台，何其傳神耶！