山貓破贏波紀錄爭入季後賽

自從新老闆米高佐敦正式入主後，山貓就遭逢兩連敗，搞到「波神」鬼咁冇癮，但好彩尋日憑謝勒華萊士及戴奧分別攻入17分，加上勇戰傷手嘅史堤芬積遜貢獻16分，結果戰至加時下，作客以95比86擊敗巫師。老臣子謝勒華萊士賽後表示：「雖然巫師今季已經冇嘢好爭，但面對呢類球隊亦唔能夠輕率，每場比賽都要保持認真態度。」事實上現時山貓正與熱火、速龍及公牛爭入東岸前八位置，四隊中有一隊會無緣季後賽，所以暫列第七的山貓並未安枕。

靠團結創佳績

為山貓創下球會紀錄36勝嘅教練拉利布朗，賽後盛讚球隊今季夠團結，係常規賽獲得佳績嘅主因。至於史堤芬積遜今場撞傷咗左手韌帶，幸好未有出現撕裂，佢指出受傷係積勞成疾，因積遜今季未有缺席過常規賽。另一方面，騎士舊將伊高斯卡斯已正式答允重返克里夫蘭，將與騎士簽約一年，最快可在今早上陣對黃蜂。

本報綜合報道