香港社會意見多元，人多口雜，乜都可以拗餐懵，唯獨特衰政府有本事「凝聚」各界「共識」，好似最新一份《施政報告》咁，左中右陣營一致鬧爆，甚至被形容為「史上最廢」，真係唔到你唔服！
港府推出「明日大嶼」計劃，聲稱透過填海興建人工島發展一千七百公頃土地，為一百一十萬市民提供住房，吹到天花龍鳳，點知原來首批單位最快都要二○三二年至入伙；最慘係唔知幾錢落樓，有人估計四、五千億元走唔甩，但以特衰政府大型基建嘅斑斑劣績，延誤超支閒過立秋，再加上司法覆核等阻力重重，埋單計數話唔定成萬億，成個香港嘅儲備分分鐘一鋪清袋。政客形容填海計劃「遺禍子孫」、「燃燒儲備」，網民惡搞改名「兵敗嶼山島」、「政府永遠聽唔島」，可謂一針見血。
冇錯嘞，廢官們與其匿喺冷氣辦公室閉門造車，拍吓個腦袋就決策，倒不如聽吓專業人士嘅高見。有做過長遠房屋策略督導委員會成員嘅學者講到明，目前並無數據支持香港非建人工島不可，建議政府留待土地供應專責小組提交最終諮詢報告再作決定。佢又質疑當局捨近求遠，明明發展棕地民意阻力較小且容易落實，對環境影響亦冇咁大，點解係都要死牛一邊頸推填海造島？
都係嗰句喇，香港最大問題唔係冇地可用，而係官老爺冇心冇肺。正如有人建議，港府可以向北大人提出，喺大灣區發展港人社區，喺當地實行港式管理同法律制度，只要醫療、交通等配套跟得上，唔愁冇吸引力。連教育局官員都承認，喺大灣區辦香港課程學校，政策上冇問題，可見好多嘢事在人為嘅啫。
即使唔講到跨境咁遠，近在眼前嘅工業邨就有唔少靚地可用。係人都知，家陣香港地工業式微，冇理由暴殄天物，由得廠房用地丟空養蚊，特別係大埔工業邨，唔單止交通網絡完善，周邊更有大型公共屋邨及私樓，學校及社區設施一應俱全，發展大型住宅區，可謂萬事俱備，只欠東風。至於廢棄校舍、公務員宿舍、私人會所、權貴俱樂部以至長期被霸佔嘅官地，收番嚟起公屋，更加可以幫到不知幾多基層無殼蝸牛！
不近情者多藏奸，拓土建屋方法多多，民間諗得到，年𢭃幾百萬嘅高官有乜理由諗唔到？有人質疑港府高層充斥「無間道」，強推造島計劃無非係為下屆政府埋地雷，是耶非耶，有人心知肚明，之但係以特衰政府嘅廢柴程度，推行一個規模比玫瑰園計劃更大嘅Project，「明日大嶼」肯定淪為「明日大鑊」，香港肯定「車毀人亡」！