綿綿不絕，必有亂結。假難民已成禍港殃民嘅治安毒瘤，作奸犯科無日無之，淨係呢兩日已發生多宗涉及南亞兵團的嚴重罪案，當中又涉及臭名昭著嘅深水埗「南亞村」。港府清拆一味歎慢板，話唔係靠害市民都冇人信。
先講南亞村嗰筆，前晚警方展開反毒品行動，喺通州街一帶發現可疑男子，一搜就搜出懷疑毒品。咁仲唔止，村內木板屋再成毒竇，一男子涉販毒被捕。至於南亞村以外嘅地方亦唔太平，尋日凌晨三名南亞刀手闖入重慶大廈，揮刀狂劈印度裔食肆東主及持行街紙同鄉；元朗亦有多名本地青年被南亞幫當街毆打，無法無天都不足以形容。
真係諗極唔明，南亞假難民來者不善，港府偏偏來者不拒，到底係乜嘢心態？齋講南亞村嘅僭建木板屋，港府鍾意就拆幾間，唔鍾意就圍封了事，再唔係就踢都唔郁，結果上址繼續藏污納垢，毒禍不斷向周邊蔓延。好似本月中吖，本報記者直擊村內毒品交易實況，有癮君子當街啪針，駭人聽聞，偏偏食環署、民政事務處等六大部門無所作為。最離譜係清拆告示貼完就算，明明話中秋節前須停止佔用，否則拆屋，點知到家陣都唔見部門採取行動，木板屋依然屹立不倒，唔係包庇係乜嘢呀！
嗱，忍無可忍，毋須再忍。尋日油尖旺區議會開會，區議員紛紛引述《東方日報》報道，鬧爆港府裝聾扮盲，要求設立禁閉營、將犯法假難民即時遣返，同埋削減人道津貼。講真，家陣連高舉人權大旗嘅歐洲都吃不消，意大利政府最近收緊難民政策，唔止嚴格審查，犯罪者立即遣返，仲計劃削減逾半人道津貼，即使惹起爭議，副總理一樣頂住壓力，一句「有人來我家販毒，我將佢哋攆回去」已令衞道之士收聲。反觀港府畏首畏尾，對毒瘤仁慈、對港人殘忍，簡直莫名其妙。
講到底，咪就係無能港府買咗偽善政客及人權組織嘅怕囉。例如嗰位被稱為「假難民之父」嘅反對派政客吖，唔單止嫌假難民在港犯事唔夠歐洲咁多，仲為佢哋爭取更多福利添，乜嘢叫手指拗出唔拗入，有辦你睇喇。仲有所謂嘅人權組織公然助紂為虐，反指摘東方嘅報道「種族歧視」，含血噴人，黑白顛倒，莫此為甚。
所以話，福禍無門，惟人自招。如果港府有東方嘅錚錚鐵骨，擇善固執，莫講話治安毒瘤一早剷除，其他社會問題亦迎刃而解。可惜吖，港府出名恐洋懼外，脊樑缺鈣，有外部勢力撐腰嘅反中亂港集團固然唔敢掂，南亞兵團一樣唔敢郁，香港人除咗硬食，仲可以點？