新一份《施政報告》出爐，當中最矚目梗係東大嶼山填海計劃喇，不過呢啲冇米粥大大話話煲咗廿一年，煲到燶都未成事，反而處理假難民問題唔使移山填海咁大陣仗，係睇港府有冇決心嘅啫，咁都拖拖拉拉，抵打喇。
冇錯，《施政報告》係就係有對假難民問題着墨，不過蜻蜓點水啫。林鄭話喎，擬明年初就修訂《入境條例》提出條例草案，改善審核免遣返聲請程序，防止各種阻延手法喎。有關修訂預計明年第一季提交立法會，死線係今屆立法會會期內、亦即二○二○年暑假前完成修訂。
所謂修訂條例，即係加大入境處羈押假難民嘅權力。現行法例僅指明入境處「有權羈留」，但因應法院判決，港府只能喺「合理時間」內羈留聲請人，今次修訂會參考當年應用於越南船民嘅法例，加入條文，指明羈留是否屬於合理時間，應考慮港府嘅資源及人手、當事人是否合作、相關領事館是否回應要求等因素，至於其他修訂就包括縮短聲請人交表及提出上訴時限等。
講真，呢啲小修小補了無新意，由上屆政府噏到今屆，有冇實際效果都成疑問。諗都諗到喇，只要香港仍然中門大開，假難民就會源源不絕湧港，不論如何加大入境處權力都係治標唔治本嘅咋。唔係咩，假難民一張行街紙在手，就好似犯罪通行證，打黑工又得，打家劫舍又得，勾結黑幫食大茶飯亦得，加上港府鍾意慷納稅人之慨，既送人道津貼，又出錢幫佢哋打官司，好吃好住好招待，唔嚟就笨喇。最離譜係修訂條例都要拖兩年，蚊都瞓、蛇都死，到時假難民又有乜嘢新招禍港，邊個講得埋呀。
話時話，玩弄司法程序呢味嘢，假難民就最耍家，請鬼容易送鬼難。嗱，入境處積壓嘅尚待審核聲請個案，話就話只餘下一千七百宗，查實上訴委員會收到嘅上訴個案有增無減，多達六千五百宗，有一半個案仲會喺上訴被拒後提出司法覆核，單係年初至今嘅司法覆核個案已由七百宗勁升至二千宗，結果到家陣仍有接近一萬四千宗聲請個案滯港，唔少個案仲一拖十多年，喺香港結婚產子，家族繁衍添。所以話，目前最可行之法就係廢除行街紙，設立禁閉營，假難民冇得通街走掘金咯喎，八人大轎請都唔嚟啦，吓話。
真係諗極唔明，作為「民主典範」、「國際標準」嘅美國可以對難民說不，連高舉「人道、博愛」大旗嘅歐洲都要重設難民羈押中心，點解港府死都唔肯？對假難民仁慈，即係對港人殘忍，唔通真係要假難民將「南亞村」擴展至禮賓府及門常開政府總部，官老爺先知驚？