近水樓台先得月，係呀，近水真係有好多着數o架，尤其當海事處有眼無珠，有法不依，對於眼皮底下有人霸佔官地都闊佬懶理，不法商人唔無本生利就笨！
呢，本報揭發柴灣公眾貨物裝卸區內，有人將泊位相連土地變身大搞「船廠」生意，仲要好似攞正牌咁拍埋短片上網賣廣告，除咗代客維修、清潔小型船隻，仲收取每月二千幾元租金，畀人喺岸上擺船。諷刺嘅係，負責監管嘅海事處辦公大樓距離「船廠」只係兩百米，平日仲有職員喺裝卸區巡邏，咁都對問題視若無睹，官老爺究竟係眼大睇過龍，定係怕咗惡人，甚至係收受利益先至扮瞌眼瞓呀？話當中冇蠱惑，三歲細路都唔信。
講真，海事處被人喺自己頭上釘蝨乸，明目張膽咁霸佔公家資源牟暴利，同小偷喺差館門口偷嘢有乜分別？最詭異嘅係，海事處話經調查冇發現有人提供維修船隻服務，不過就發現有啲小艇。喂，海事處都話啦，泊位只係用作船隻裝卸一般貨物，好似沙、碎石、水泥同廢紙，如今出現小艇，咁仲唔係有晒證據可以拉人封艇做嘢？更可笑係，海事處話喎，營運商話嗰啲小艇係貨物嚟嘅，咁就好似孔乙己話竊書唔算偷，咁你都信？明明一般居民都覺得有問題，但官老爺偏偏話冇問題，不近情者多藏奸，廉記請佢哋飲咖啡都得嘞。
話時話，類似嘅霸佔官地都唔係新聞咯，好似筲箕灣有人將政府批出畀人做船廠嘅土地，「劏」成多個單位分租畀人做車房，估計月入六十萬，不過向政府繳交嘅年租只係十二萬啫，真係發過豬頭；亦有鴨脷洲海旁道船廠，以每月一萬多元嘅超筍價向政府租地，再將泊位轉租畀豪華遊艇停泊，一個月最多收十萬銀，簡直肥過肥仔水。睇到啦，一而再再而三咁有官地變成不法商人嘅提款機，港產官僚都係懶懶閒唔正視，唔係鼓勵人犯法，又係咩呢？
講嚟講去，呢個政府就係懶到出汁，笑罵由你笑罵，好官我自為之。睇吓深水埗「南亞村」都係咁，呢度點止係販毒特區，仲係武器庫同埋黑幫收o靚場，官老爺早前喺村中貼告示，話中秋節即政府接管嘅最後限期喎，結果期限過咗都無動靜，姑息養奸成咁，問你服未？
政府冇神經冇靈魂，香港就係咁荒謬o架喇。誠實守法嘅市民年年交稅，不過就連風災後塌樹都要自己清，而不法之徒大走法律罅就賺到盆滿缽滿，公帑損失不知凡幾。港府帶頭有法不執，欺軟怕硬，港獨、反中亂港、南亞兵團有乜辦法唔四出作惡，香港又點會唔禮崩樂壞？