「你問我愛你有多深，我愛你有幾分？」尋日係中秋節，特衰政府唔知係咪想趁機向南亞假難民表明月亮代表我的心，深水埗通州街橋底「南亞村」木板屋竟然話拆又唔拆。港府對南亞治安毒瘤展現無疆大愛，假難民就花好月圓咯，難為七百萬市民被呢班友搞到雞犬不寧，你話特衰政府係咪手指拗出唔拗入吖！
食環署同民政事務處早排浩浩蕩蕩殺落南亞村，用膠帶圍封四間木板屋，講明佔用人要喺尋日限期前清走屋內雜物，點知官老爺結果又係無動靜，慌唔係班官忙住做節，加上唔想阻住南亞兵團人月兩團圓，所以拖得就拖咩？港官尋日唔做嘢，今日公眾假期更加唔使旨意佢哋郁手；而既然唔想南亞幫佳節流流掃興，唔爭在嚟緊十一、聖誕、新年……天長地久通融落去。嗱，咪畀人批中，班廢官梗係自己冇膽郁班南亞幫，想話等市民好似清理風災後堆滿街嘅塌樹咁，忍無可忍自己出手喇。
大家有眼見，南亞村毒品問題已經失控並擴散，本報直擊該區有癮君子喺大街大巷「上電」後不省人事，有人喺唐樓樓梯拉低褲頭用針筒注射毒品，仲有懷疑癮君子濫藥後攤喺路邊猝死，有老街坊仲話就算報警都拉唔到人，懷疑販毒集團有保護傘撐腰，慨嘆社區沉淪。你哋話嘞，面對深水埗淪為九反之地，港府依然闊佬懶理，清拆行動依然大歎慢板，林鄭到底係「與市民同行」抑或「與假難民同行」？
講真，南亞幫勢力遍地開花，唔單止深水埗，成個香港都已經沉淪。港府既唔願意收緊難民政策，亦唔肯重設禁閉式難民營，由得假難民成為黑幫招攬目標，四出作惡。好似前排紅磡有南亞匪斬劫珠寶店職員搶走六百萬，又有市民喺港鐵懷疑被南亞匪偷走財物，有找換店東主甚至被南亞匪劫到怕，索性結業避之則吉。市民終日擔驚受怕，食不甘味，唔知幾時會成為呢班亡命之徒嘅目標，想過個平平安安嘅中秋都難。
所以話啫，呢個自吹「好打得」嘅政府，實際上只係銀樣鑞槍頭，睇得唔打得。鬼咩，官老爺出入有專車接送，又有警方開路，南亞兵莫講話打佢哋主意，想埋身都難。班官針唔拮到肉唔知痛咯喎，就梗係可以翹埋雙手樂逍遙啦。
講多無謂，食多會滯，港產官僚對付香港市民，尤其係公公婆婆異常兇猛，一副鐵面無私嘅面孔，反而對住南亞兵就萬般呵護，關懷備至，不如索性改名叫「香港南亞特區政府」，正式宣布今後「南亞人優先」，土生港人淪為二等公民，咁咪可以名正言順咁厚南亞，薄港人囉！