超強颱風山竹來去匆匆，一吹就吹出特衰政府防災不力、應變失當嘅無能真面目，全港多區至今仍然頹垣敗瓦，一片狼藉，簡直眼冤。正如「東方報業民意調查」顯示，絕大部分受訪者直斥港府災前緊張，災後冇影，不知所謂。嗱，日內可能又有另一超強颱風殺到，靠廢官防災，唔擔心就假。
提起港府應對山竹嘅甩轆嘢，真係三日三夜數唔完。淨係睇各部門善後不力，倒瀉籮蟹，市面復原進度蝸行龜步，就知呢個政府只識災前做騷，災後卸膊。好在人間有愛，尋日又有市民拉大隊去西貢鹹田灣做義工執發泡膠碎，實行自己香港自己救，否則旨意港府喎，聽引發生態大災難都似。
至於其他「災區」嘅塌樹情況一樣慘不忍睹，塌樹殘枝丟喺路旁冇人理，阿婆細路唔仆親至奇，唔靠市民自己出手，隨時擺到出年都仲喺度。仲有呀，廢物轉運站嘅垃圾車大排長龍，情況持續多日，司機怨聲載道，偏偏政府闊佬懶理，死都唔肯加班運作，香港垃圾圍城、淪為臭港就係咁解。難怪有人質疑，外判清潔工做唔切，紀律部隊又唔肯伸出援手，乜都靠市民自發行動，交咁多稅畀特衰政府把鬼呀。
所以話，天災無情，幾時都唔及港官無能咁可怕。大家有眼見，呢班廢官畀全城鬧爆依然毫無愧色，唔係自吹防災「暢有成效」，就係連冇諗過咁大鑊都講得出口。呢，尋日又輪到勞福局局長羅致光廢噏贈興，喺網誌話對於全市停工要求，港府好難「一刀切」喎，事關乜嘢工作有得停工、乜嘢情形冇得停工，好難巨細無遺列晒出嚟，希望僱主僱員自己拆掂佢。喂，勞資雙方立場唔同，口同鼻拗，咁容易拆得掂，呢個世界就唔會有咁多勞資糾紛嘞。為官避事平生恥，高官淨係識將個波大腳踢畀市民，仲有乜存在價值吖。
講真，堅離地嘅高官多不勝數，好似風災後首日復工，引發全港交通大混亂，運房局局長陳帆竟然唔知閃咗去邊，搞到網民話要拋西瓜尋人。不過你咪理，一講到傍老細巡高鐵咯喎，佢老哥唔止準時蒲頭，直情鬼打都冇咁精神。到底市民喺呢班高官心目中算係老幾，畫公仔唔使畫出腸喇。
嗱嗱嗱，唔係嚇你，天文台預告另一颱風潭美來勢洶洶，中秋節翌日就會升級為超強颱風，同山竹同級，香港會唔會再次遭殃，真係冇人講得埋。隨住氣候暖化愈演愈烈，超強颱風愈來愈多，港府仲唔吸取教訓，加強防風及災後應變，下次仲可唔可以「安然度過」，邊個保證到呀。