佛家有云，萬般帶不走，惟有業隨身。超強颱風山竹雖然離開香港半個幾月，不過特衰政府清理塌樹慢過烏龜，唔少地區到家陣仲係一碌二碌爛樹無人清理。港府「慢搬帶不走」嘅佛系式清樹，何止無能，直情造孽喇。
咪睇特首林鄭月娥自誇防災「暢有成效」，香港「安然度過」，事實係另一回事，本報記者聯同樹木專家巡視全港多區，發現爛樹圍城，危樹處處。好似何文田一處斜坡，有棵樹被吹到連根拔起打橫瞓喺上面，只要落場大雨、打多個風，碌落嚟都有之，被專家列為高危「紅燈」級別就係咁解；至於青衣青康路一帶，枯枝殘幹吊吊揈，途人隨時中頭獎；仲有九龍城宋王臺遊樂場，近半個球場被塌樹遮蓋，打波市民隨時被插爆眼，都咪話唔牙煙。
其實，莫講話「紅燈」級嘅高危塌樹喺港九新界隨處可見，程度稍次一級嘅「黃燈」級危險塌樹亦遍布大埔、藍田等地，市民出入同搵命博冇乜分別嘅咋。最弊係你急佢唔急，港府清理塌樹危樹懶懶閒，班官仲話已經將高風險嘅塌樹優先處理喎。喂，清樹清咗半個幾月，全港仲係「紅燈」、「黃燈」高懸，官老爺仲好意思多多辯駁，有冇再離譜啲吖。
非常時期用非常手段，面對史無前例嘅超強颱風，港府係咪應該加派人手加快善後呀？可惜吖，康文署話就話風災後每日派出九百人清理塌樹，房署又話按足程序加緊處理，講到鞠躬盡瘁咁款，實際上清樹人手仍然嚴重不足，專家計過，起碼爭成二千人至搞得掂。對於冇即時危險嘅個案，當局仲要歎慢板，期間會唔會有意外發生，邊個講得埋。難怪專家鬧爆，政府既唔識種樹護樹，出咗事又唔肯增加人手，全港數萬棵塌樹，恐怕要半年先至清得晒。港產官僚應變有幾差，管理有幾亂，一鋪睇晒喇。
話時話，樹木辦雖已成立多年，無奈呢個衙門出名廢，過去仲經常發生呢頭驗樹、嗰頭塌樹嘅奪命事故。講真，樹木辦嘅外判人員質素良莠不齊，目測驗樹更係備受詬病，加上港府胡亂種樹，唔係亂選樹種，就係唔夠泥土空間生長，變成頭重腳輕嘅「盆栽樹」，一陣風就吹冧，港府死都唔肯正視問題，想唔死得人多都難。
講到尾，港產官僚就係全港最大碌廢柴，政務司司長張建宗咪係典型囉，日前率領九個政策局局長為風災應變不力解畫，一方面話好明白市民感受，一方面又拒絕為緊急停工立法，結果被市民鬧爆堅離地、冇承擔。都係嗰句，港府靠得住，豬乸會上樹，市民都係自求多福喇。