以五二折定價嘅新一期居屋尋日派表，唔使問阿貴都知，房委會門外大排長龍。如果一滴水看穿世界，咁一條長長人龍，足以反映無殼蝸牛嘅上樓需求有幾咁迫切。可惜吖，莫講話新居屋杯水車薪，無助解決上樓難嘅問題，港府拓土建屋一味拖先至最大鑊。
點解話港府一味拖，睇吓「土地大辯論」咪知囉。呢，為期五個月的大辯論尋日結束，土地供應專責小組聲稱收到九萬幾份書面意見及問卷，日前已向政府提交初步觀察，急成咁，唔通有料到？非也，所謂嘅初步觀察，其實又係嗰三幅被，無非發展棕地、發展私人新界農地、利用私人遊樂場契約用地、維港以外填海同埋發展郊野公園邊陲，唔止毫無新意，而且阻力重重。
諗都諗得到啦，發展棕地觸動鄉紳利益，公私營發展農地又惹起官商勾結爭議，收回粉嶺高球場激起權貴反彈，填海及發展郊野公園邊陲更被批評為「逆天行道」、「思想癌」。再加埋各大政黨、組織、智庫、環團加把口表達意見，人多口雜，言人人殊，根本冇可能得出共識。試問咁多場公開諮詢，有邊一場冇引發混亂呢？有行會成員怒撕問卷「點心紙」，批評大辯論浪費時間，唔係冇道理o架。
最好笑係，小組主席黃遠輝仲死撐，話大辯論最大意義係讓市民認同香港土地短缺喎。吓，花千幾萬公帑教育公眾「阿媽係女人」嘅道理，有冇再荒謬啲呀？香港缺地由前朝講到今日，一時寸土必爭，一時見縫插針，早已人所共知，使鬼官僚教咩。計功夫茶話齋，尋求共識、教育公眾係假，拖延時間、推卸責任至係真。
港府冇嘢叻，最叻就係研究復研究，諮詢復諮詢，土地大辯論亦係一樣，諮詢完仲要分析，分析完又再討論，咁樣搞一搞，港府五年任期又到尾聲，爛攤子就可以擊鼓傳花，丟畀下屆。好似東大嶼填海咁吖，老董年代已經提出，拖到上屆先至有啲眉目，最近又有人提出擴大填海範圍至二千二百公頃，以港府作風，咪即係要再諮詢？再蹉跎多廿年？到時林鄭阿姐佢已經返咗英國老家頤養天年嘞。何況遠水難救近火，大辯論提出嘅都係中長期建議，點解燃眉之急呀。
所以話，香港唔係缺地，而係缺有承擔嘅政府。乜都丟畀公眾討論，乜都尋求社會共識，結果係築室道謀，三十年無成。都係國家領導人講得啱，「為官避事平生恥」，港府話就話行政主導，實情係遇到難題繞路走，一遇阻力即跪低，簡直羞恥。咪話功夫茶唔提醒，人生冇幾多個十年，一味蹉跎歲月，香港玩完都似。