開講有話，高手在民間，港產官僚拓土建屋出盡吃奶之力，一時話「見縫插針」，一時又話「寸土必爭」，始終都係姿勢大過實際，反而專家學者動動腦筋，往往有唔少有用創意，好心班廢官學吓嘢喇！
有大學最近就獲慈善團體資助，展開為期三年研究計劃，八十多名參加者分成七個團隊，喺短短一個月時間內考察包括廢棄校舍以及天橋底等五個閒置空間，睇吓點樣可以改建成過渡性房屋。除咗喺空地安裝預製組合屋，佢哋仲建議將老舊建築翻新復修，又或者將良心業主捐出嘅單位重新設計並提升管理及營運效率，再一次證明「辦法總比困難多」嘅道理。
大家有眼見，今屆政府推動過渡性房屋遠比前朝積極，包括同社企合作嘅組合屋、共享房屋以至「暫租住屋」等，可謂名目繁多，有行會成員更加預告嚟緊施政報告，組合屋將會係「重中之重」。冇錯，家陣公屋輪候大軍連同劏房戶，人數多達數十萬，暫解無殼蝸牛燃眉之急，無可厚非，問題係過渡房屋畢竟數量有限，好似由社企主導嘅深水埗南昌街組合屋項目咁，只能提供九十個單位，加埋其他幾個非政府組織項目，都係得幾百個單位，連負責人都承認杯水車薪，治標不治本。
再講吖，即使少數公屋輪候戶有幸入住過渡房屋，幾年後又要搬走，你叫人到時點算？係打回原形，住番豬欄、雞棚改建嘅劏房吖，定抑或索性瞓街呀？
始終都係嗰句，解決房屋問題離唔開拓土建屋，增加供應。可惜吖，港府一味玩拖字訣，所謂「土地大辯論」風風火火搞咗一大輪，結果又係莫衷一是，言人人殊，睇怕最後都係得個吉。難為財政司司長陳茂波尋日仲好口響咁話，現時嘅填海技術足以克服環境、空氣流通以至排污等技術性問題，只要主流民意支持填海，相信立法會「唔夠膽唔批錢」喎，真係唔知嘅嚇死，知嘅笑死。家陣香港地撐填海仲慘過犯天條，隨口噏吓都畀人剷到上天棚，好似新加坡政府咁強政勵治都仲話搞得掂，特衰政府弱過藥材舖，講乜都嘥氣！
係人都知，香港唔係無地可用，只係港府捉到鹿唔識脫角，暴殄天物啫。有團體計過數，港府仲有五百幾幅官地未被善用，地點遍布葵青、元朗、屯門等已發展社區，交通配套樣樣齊，可以滿足超過二十萬人住屋需要，官老爺使乜捨近就遠吖！
一句講晒，港府拓土無力，一味小打小鬧搞過渡屋，講得好聽啲就「官民合作」，講得難聽啲就「官府卸膊」，擺明搵市民老襯！