內地有套大熱電影叫《我不是藥神》，反映老百姓睇唔起病、食唔起藥嘅殘酷現實。查實睇病難嘅問題點止發生喺內地，香港隨時有過之而無不及，尤其對於窮人嚟講，患病即係等死咋。
講起就唏噓，香港話就話係富裕社會，實際上貧窮人口有增無減，老年貧窮仲不斷惡化添。淨係講白內障呢個咁常見嘅老人病吖，雖然唔係乜嘢奇難雜症，但一樣大把人冇錢醫治，令視力嚴重受損，甚至致盲。港大統計顯示，以七十至七十九歲嘅長者人口為例，多達七成人發病，接受白內障手術嘅人口不足兩成，咪就係錢作怪囉。
正如眼科醫生話齋，患者接受手術後，遇上交通意外嘅風險減少近一成，手術後五年及十年嘅存活率高出兩成，證明及早接受手術，有助延年益壽。咁又係呀，老人家耳又聾、眼又矇，容乜易發生意外，做手術換回視力，梗係命都長啲喇，可惜吖，目前喺公立醫院輪候做白內障手術嘅患者超過五萬人，每年仲有逾二萬宗新症，老人家排期動輒數年，隨時等到含恨而終。
冇錯，醫管局係就係有公私營合作資助計劃，收費上限一萬三千蚊，之但係對於貧窮長者嚟講，呢筆錢絕對唔係小數目，何況受助人數有限，聊勝於無咋。一節見則百節知，窮人連一萬幾千嘅白內障手術費都負擔唔起，何況其他頑疾重症嘅醫藥費吖。
事實擺在眼前，標靶藥物每月費用冇幾皮嘢都唔使旨意埋單，一年下來就要幾十萬，莫講話基層畀唔起，中產亦吃不消，唔少家庭為咗醫病傾家蕩產、欠債纍纍，怎一個慘字了得。呢，早前有一篇癌症家屬嘅血淚控訴文章喺網上瘋傳，公院醫生叫病人用三萬蚊一針嘅免疫療法，冇錢醫就話之你，最後病人負擔唔起昂貴藥費，一命嗚呼。你話喇，港府坐擁金山銀山，財政儲備高達逾萬億，偏偏對醫療投入斤斤計較，如果港產官僚稍有人性，好多家庭就唔使搞到支離破碎咁慘情嘞。
仲有吖，咪睇特首林鄭月娥擺出關心基層狀，做戲咁做嘅咋，罕有病患者求助無門咪就係人辦囉，經年累月咁爭取，港府先至肯動用關愛基金資助部分藥費，但受惠人數十隻手指數得晒。食衞局官僚話喎，正研究調整長期負擔昂貴藥物嘅病人補助安排，年底公布細節。聽住先喇，最怕又係假仁假義，小打小鬧，諸多設限咋。
冇計嘞，有錢有得醫、冇錢冇得醫，呢個就係香港嘅殘酷現實，堅離地高官點會明白吖。《我不是藥神》嘅主角不惜鋌而走險，走私印度仿製藥救人自救，睇怕呢一幕好快喺香港上演咯。