怪事處處有，香港特別多。嘉道理農場一名外籍高層，日前強搶東方報業集團記者手機並刪除採訪材料。正義傳媒梗係決不姑息，依法追究，絕對唔會任由新聞自由被踐踏，縱容惡人橫行喇。
講起呢單洋人強搶手機事件認真(手窊)爆頭，話說本報記者喺嘉道理農場外採訪一宗女職員被鐵閘壓傷嘅意外，喺冇阻礙救援嘅前提下，多名農場職員突然包圍記者，有人大喝「刪走啲相」，有人怒目而視，該名外籍高層更加唔知出於乜嘢心態，動口不特止，仲動手搶走記者手機添。
咁野蠻都得，你估家陣係洋人惡晒嘅清朝咩？雖然農場一男一女職員後來交還手機，不過手機被搶前拍攝嘅相片同短片統統人間蒸發。農場只肯就搶手機同刪相道歉，但死都唔認刪片。東方決定報警處理，警方高度重視，列作刑事毀壞案，交由大埔警區重案組接手，尋晚仲拉咗涉事洋高層同一名女職員，呢單嘢最後點收科，大家記住(目及)實呀。
正如有立法會議員話齋，強搶手機呢個行為本已令人髮指，仲要擅自刪相刪片，咁就唔止打壓新聞自由咁簡單，直情係破壞他人財產，性質嚴重。究竟係乜嘢驅使一個洋人如此肆無忌憚，視法律如無物？如果話漢奸黎舊年涉嫌刑恐東方記者案，律政司拖延逾十五個月都唔檢控，為社會樹立壞榜樣，變相鼓勵其他人有樣學樣，雖不中亦不遠。
大家有眼見，漢奸黎舊年六四粗言辱罵及恐嚇東方記者，有圖有片證據如山，警方一早完成調查，但律政司係都要庇奸護淫，大玩拖字訣，就算早排終於開綠燈，指示警方搵漢奸黎錄口供，一樣錄完就算，冇晒下文。東方九度去信查問案件進展，包括受害記者親自質詢，律政司唔係裝聾扮盲就係講虛話廢話。鬼咩，漢奸黎替外國勢力執行反中亂港詭計，又有洋助手做跑腿，出名恐洋懼外嘅港府自然唔敢動其分毫，就連政治黑金案，律政司都夠膽死一句「證據不足」將其放生，仲有乜嘢做唔出吖？洋走狗都可以為所欲為咯喎，正宗洋人唔放傳媒在眼內，攞正牌喇吓話。
話時話，尋日係佔領行動四周年，至今只有九名主要搞手被檢控，仲要有排未正式進入審訊，佔中幕後黑手兼最大金主嘅漢奸黎更係逍遙法外。律政司司長鄭若驊被問到幾時至捨得將其餘三十幾個搞手落鑊，阿姐佢居然應都唔應，睬你都傻咁款，唔使審，又係想拖到不了了之啫。所以話，律政司唔係捍衞法治，而係包庇惡人，香港有乜辦法唔法治淪喪、禮崩樂壞吖！