經典金曲都有得唱︰「深信幸運是在我手裏，今天我能高飛。」其實呢句嘢用嚟形容香港國際機場，一樣咁貼切，事關嗰個爛鬼空管系統經常發雞盲，三日唔埋兩日爆發九霄驚魂，到今日都冇搞出人命，乘客仍能如常「高飛」，真係少啲運仔都唔掂！
呢嗱，話口未完又嚟喇。國泰航空上個禮拜一班由台北返港客機，臨到最後着陸、機身距離地面只有三百呎之際，機師突然發現一架商務飛機仍未駛離跑道，搞到要喺兩、三秒間臨急臨忙全速「抽頭」向上攀升。雖然話好彩逃過一劫，但乘客十足十玩跳樓機一樣，食驚風散都食到飽。
每次爆親大鑊，民航官僚例牌菜又係大耍官腔，企圖掩蓋問題，佢哋話喎，航機因不同情況進行標準復飛間中都會發生，強調新空管系統喺過程中運作正常。乜話，咁都係「運作正常」？大家不妨聽吓身兼民航機師嘅立法會議員點樣踢爆。對於航機飛行嚟講，三百呎差唔多已經係last moment，空管人員應該及早指示機師跑道受阻，以便盡快減慢航行速度。
所以話，民航官僚嘅所謂「復飛正常論」，分明侮辱市民智慧。冇錯，類似個案一年大概三百幾宗，但絕大多數涉及惡劣天氣，機師早有心理準備，好似事發當日咁萬里晴空，風和日麗，十年唔逢一閏；更加絕少好似今次咁千鈞一髮至嚟考驗機師嘅「急才」。須知道機場跑道有障礙物，後果可大可小。十八年前一架法航客機由巴黎機場起飛，就係因為輾過另一客機掉落跑道嘅金屬零件，隨即起火自焚，機上逾百名乘客及機組人員全部罹難，呢啲咪血的教訓囉！
講開又講，新空管系統自一六年尾啟用以嚟，甩漏多過食飯，淨係系統磨合故障就發生十二次之多，其他好似「鬼影」、「疊影」等問題多不勝數，飛行間距不足事故更創六年來新高。查實新空管系統試用期間已經千瘡百孔，一修再修，最終醫番都嘥藥費，十幾億公帑白白倒落鹹水海。不過你咪理，無論係當年拍板購買嘅前特首曾蔭權爵士，抑或實際採購嘅已故前民航處處長羅崇文以及一眾高層，統統毋須問責。更可悲嘅係，民航官僚為免孭鑊，不惜化身承辦商代言人，死撐系統「正常」，就更加同草菅人命冇咩分別。
一滴水可以睇穿整個世界。如果話空管系統發雞盲，咁鐵路工程醜聞多多，高官要到「睇報紙至知」，成個特區管治架構何嘗唔係無靈魂無心肝。最慘係市民焗住高薪養廢，同空管系統一樣欲換無從，嗰下先至攞命吖嘛！