木秀於林，風必摧之。東方一向嫉惡如仇，為民請命，從來唔向惡勢力低頭，可能不招人妒是庸才啩，有啲牛鬼蛇神谷住道氣，係都要搵啲唔識死嘅傻仔出手，匿喺網上中傷誹謗東方，以為神不知鬼不覺，咁就大錯特錯嘞！
呢，壹淫媒老闆漢奸黎早前無喇喇爆粗兼涉嫌恐嚇本報記者，話要「搵人搞你」喎，警方唔敢怠慢，列為刑事恐嚇案調查。成件事發生冇幾耐啫，即有網站出現誹謗東方及東方創辦人嘅言論，結果喺收到東方律師信後，有關貼文被刪除，但江山易改，本性難移，有人仲未知衰，同一網站近日又再出現兩段新貼文中傷東方，你話呢個世界會唔會有咁多巧合呢？
即係咁，犯東方者，雖遠必誅，雖難必誅，呢個不嬲係東方做人處事嘅宗旨。過去好多唔知碇嘅二打六係都要喺網上挑戰東方底線，結果喺東方窮追猛打之下，一個二個原形畢露，輸到底褲都冇得剩咁滯，有啲要喺《東方日報》、《太陽報》同on.cc刊登道歉啟事，有啲仲要賠錢添，呢啲咪叫唔衰攞嚟衰囉。就算誹謗者遠至台灣，唔理追討費用幾乸脷都好，東方一樣絕不放棄討回公道嘅機會，最後嗰啲垃圾媒體咪又係要向東方跪低。
大家睇到喇，有啲傻仔以為言論自由大晒，以為喺網上做乜都無王管，噏得出就噏，甚至幫人做打手，其實係自掘墳墓嘅咋。正如專家話齋，網上留低嘅蛛絲馬迹隨時比現實世界更多，魑魅魍魎根本無所遁形，要追究法律責任話都冇咁易。所以話啫，東方手握法律之劍、降魔之杵，有人係都要好似《水滸傳》中嘅潑皮牛二咁以身試法，東方一定成全o架！
講開又講，呢啲網上誹謗言論重重複複三幅被，同一格式同一用字，一啲新意都冇，除咗反中亂港集團對東方恨之入骨，真係諗唔到仲有邊個咁得閒，話幕後黑手呼之欲出就係咁解。講到尾，都係港府放縱姑息惹的禍，壹淫媒宣淫販賤、無中生有咁多年，幾乎次次都被司法放生，同變相鼓勵冇乜分別；至於漢奸黎出錢出力策劃佔中，至今仲未落鑊，更係荒天下之大謬。如果唔係港府投鼠忌器，有法不依，做壞規矩，搞到啲人有樣學樣，香港又點會立立亂喎。
講到呢度，功夫茶不禁諗起毛伯伯寫嘅兩句詩：「金猴奮起千鈞棒，玉宇澄清萬里埃。」冇錯嘞，東方同孫大聖一樣，對付妖魔鬼怪絕不心慈手軟，就算誹謗者同埋幕後黑手匿到天涯海角，一樣會將佢哋刮出嚟，想逍遙法外？發夢冇咁早！