唔經唔覺，牛頭角迷你倉大火發生差唔多一年。好多人肯定想知道當局監管迷你倉有乜嘢進展，實情就係，問題非但未有緩解，反而愈演愈烈，仲催生一種叫做「走鬼迷你倉」嘅物體添，危險程度有過之而無不及，分分鐘爆大鑊都似！
話說牛頭角迷你倉大火後，當局整咗場亡羊補牢大龍鳳，部分有能力嘅經營者落重本改裝以符合消防等要求，其他頂唔住嘅索性關門大吉，估計摺埋嘅迷你倉達二百間，佔整體兩成咁多，都算有一定效果。問題係，部分唔合格嘅迷你倉走精面，以月租形式平租倉位，務求喺被取締前賺盡每一分每一毫，呢啲就係所謂嘅「走鬼迷你倉」嘞。
本報記者實地視察過，發現呢類迷你倉極之搶手，某個位於荃灣沙咀道工廈嘅走鬼倉，逾九成半租出，直頭係有買趁手嗰隻。鬼咩，四十呎儲存倉出面月租講緊一千六大元，走鬼倉六百零蚊有交易，足足平成半。由於隨時拉人封舖，所以佢哋同客戶簽約亦係逐個月逐個月計，諗都諗到嘞，既然今日唔知聽日事，消防同安全設施梗係有咁求其得咁求其，灑水花灑生晒銹有之，滅火筒被雜物冚住有之，喉轆架滿布塵埃有之，真係睇見都牙煙，一旦有火警，後果真係不堪設想！
走鬼倉大行其道，當局監管不力，絕對難辭其咎。截至上月底，消防處向七百多間迷你倉發出超過四千張消除火警通知書，只有二百幾張照辦，正因為執法部門慢條斯理，hea住嚟做，經營者先至有空子可鑽。
當然啦，消防等部門懶懶閒閒固然抵炳，但講到底有需求就有市場，今日取締完走鬼倉，聽日又有第啲古靈精怪新花款蒲面嘅啫。正如有業界人士話齋，香港人居住空間不足，屋企雜物以至個人收藏唔捨得丟棄，迷你倉自然成為唔少人生活必需品。呢，之前有團體做過調查，發現香港人對家居儲物空間嘅不滿程度冠絕全球，加上港人平均居住面積愈來愈逼仄，同十年前比足足縮水一半，迷你倉唔開通巷至奇！
所以話，消防同安全問題只係迷你倉亂象最表面嗰浸，最深層次嘅房屋問題唔解決，點樣加強巡查都只能治標不治本。情況就好似豬欄雞竇劏房四面開花，連上床下廁嘅籠屋都有價有市，皆因有頭髮冇人想做瘌痢，你估真係貪馨香咩！
港產官僚冇嘢叻，最叻就係扮鴕鳥，港府拓土建屋不力，對劏房亂象固然隻眼開隻眼閉，對迷你倉亂象亦只係識做表面工夫，成個港府冇靈魂，結果咪搞到消防危機四伏囉！