老人家教落，睇人唔可以只睇表面，睇書唔可以只睇封面。可惜吖，港產官僚好衰唔衰，乜都睇表面，監管樹木靠目測，搞到塌樹死人事故不斷；家陣居然連監察基建工程嘅安全問題都係靠目測，隨時死得人多！
講緊嘅咪就係命途多舛嘅港珠澳大橋香港段囉，自開工以來事故多多，以致有「奈何橋」、「血淚橋」之譏，個朵一早臭出國際，點知屋漏偏逢連夜雨，最近又爆出土木工程拓展署承辦商涉嫌貪污兼弄虛作假醜聞，淪為「腐敗橋」。家陣冇嘢驚，最驚大橋淪為豆腐渣工程，冇面事小，橋毀人亡事大！
即係咁，今次事件雖然係署方主動揭發，但咁多年來都被蒙在鼓裏，直至工程尾聲先至爆大鑊，官僚有幾廢，監管有幾兒戲，唔使問都知。最荒謬嘅係，出事後署方一直語焉不詳，尋日有官員上立法會解畫，就連問題石屎涉及大橋邊啲部分都十問九唔知，唔係推說大橋品質由路政署跟進，就係話初步目測未見有異常喎。喂，目測靠得住，豬乸會上樹喇！
唔係咩，目測即係靠肉眼檢測，有幾準大家心中有數，如果望吓就知龍與鳳，咁咪仲勁過X光？如果人類真係具備孫大聖嘅金睛火眼，呢個世界仲使發展高新科技咩，仲使發明檢測機器及技術咩，咁都講得出，擺明當人傻嘅啫。正如立法會議員話齋，如果目測都睇到大橋有異常，即係隨時冧得，就算目測睇唔到有問題亦唔代表安全，所以話廢官講廢話就係咁解。
真係諗極唔明，到底署方用乜嘢準則聘請承辦商o架？師奶買棵菜都會貨比三家，何況港珠澳大橋係國家級工程，絕對不容有失，偏偏當局千揀萬揀，揀着個爛燈盞，好難唔令人懷疑官僚係咪連聘請承辦商都靠目測了事，背景、資歷、條件乜都唔使審查，結果好眉好貌生沙蝨。最弊係連監管責任都一併外判，唔止倒錢落鹹水海，直情草菅人命。你話喇，大橋好事多磨，話就話今年底可以通車，點知節骨眼上又出問題，萬一拆卸重來，通車唔知又要拖到幾時，拖內地及澳門後腿就梗嘅嘞，最驚廢官為咗面子，唔理安全夾硬通車爆大鑊，咁就點掹都掹唔返。
講起就唏噓，港珠澳大橋一早就有人提出，如果早廿年興建，香港物流業勢必如虎添翼。可惜吖，港府一味議而不決，早就錯失時機，家陣仲不斷爆出醜聞，鑊鑊新鮮鑊鑊甘，都唔知點收科。嗱，當局話今日舉行記者會交代事件喎，咁就唔該坦白從寬，千祈咪錯完又錯吖。