西諺有云︰don't bite the hand that feeds you。大家睇吓漢奸黎爆粗涉嫌恐嚇記者之後，全城一致鬧爆，反而口口聲聲捍衞新聞自由嘅記協裝聾扮啞，主席更加做埋縮頭烏龜，連蒲頭都唔敢，呢啲咪叫「吃人嘴軟，拿人手短」囉。
成件事一清二楚，漢奸黎無喇喇發爛渣辱罵本報記者，「×你老母×」之餘更揚言「影×咗你張相」、「我實會搵人搞×你」，輿論嘩然，群情洶湧，連警方都不敢怠慢，列作刑事恐嚇案調查，記協有乜理由當冇事發生？唔通喺佢哋眼中，《東方》記者唔係記者？
當然喇，避得一時唔避得一世，連日嚟多個團體要求記協交代立場，眾怒難犯，記協惟有死死地氣發表書面聲明，可惜得嗰寥寥幾行文字，莫講話冇譴責漢奸黎暴行，成篇嘢直情溫溫吞吞，弱雞到冇人有，一味叫記者「採訪時若認為受到被訪者言語威嚇，報警備案乃最恰當之做法」。正所謂養兵千日，用在一時，記協年年搞大龍鳳籌款，搵埋唔少錢，今次正正係展現「決不向打壓新聞自由的力量低頭」嘅錚錚風骨之時，佢哋居然關人個關，一嘢將個波卸畀警方，試問仲有咩存在價值？乾脆摺咗佢喇笨！
記協對漢奸黎鵪鶉咁都算嘞，最不堪嘅係否認公開譴責唯恐不及，強調網上以佢哋名義發表嘅係「虛假聲明」，仲話已就事件報警。其實大家睇番網上流傳嘅「虛假聲明」，就知點解記協咁緊張。其中有一句係咁講嘅︰「本協會今後拒絕接受黎智英的任何捐款，黎智英今後的任何行為與本協會無關」。試諗吓，萬一漢奸黎「不明真相」，以為記協真係「大義滅親」而怒閂水喉，咁就大事不妙，唔怪得記協第一時間「以正視聽」喇！
講開又講，記協對漢奸黎呵護備至，大家早就見怪不怪。正如有人質疑，如果爆粗恐嚇人嘅係其他報社老闆又或者係親中人士，被罵嘅係壹淫媒記者，記協肯定第一個撲出嚟譴責抗議，跟手發聲明哀悼「本港新聞自由最黑暗的一天」。
大家應該記得早排特首選舉，有學者唔肯聽漢奸黎支笛，為鬍鬚曾唱讚歌，結果被對方抹黑成「中共臥底」，繼而被壹淫媒全面封殺，對於赤裸裸嘅以言入罪，記協視若無睹。反觀某資深傳媒人不滿喺左報嘅文章內容同標題被改動，記協即時大動干戈，上綱上線，抗議言論自由受打壓，呢啲唔係雙重標準龍門任搬又係乜？
所以話，漢奸黎爆粗兇記者呢單嘢就好似照妖鏡咁，牛鬼蛇神當堂無所遁形，除咗大玩親疏有別嘅所謂記者組織、幫漢奸黎曲線護航嘅所謂愛國報章，仲有就係嗰班受漢奸黎黑金豢養嘅所謂民主派議員，成班人沆瀣一氣朋比為奸，絕對係「新聞自由」嘅公敵。佢哋一日橫行無忌，香港一日都唔使旨意有運行。