愛國詩人屈原嘅不朽名句︰「長太息以掩涕兮，哀民生之多艱。」今日端午節重溫，別有一番滋味。唔係咩，香港七國咁亂，房屋、醫療、教育瓣瓣唔掂，民生艱困比當年楚國有過之而無不及，如果屈原仲在生，睇怕都會激到跳多次江。
講真，香港人其實好實際，但求安居樂業，有餐安樂茶飯就得，現實卻係無殼蝸牛繼續望樓興嘆，年輕人上位難過登天，至於講到安樂茶飯咯喎，香港雖然未至於好似歐洲咁，三日唔埋兩日爆發恐襲，之但係假難民犯罪一樣搞到市民有得震冇得瞓，淨係呢幾日，南亞匪搶劫找換店老闆、越南漢尋仇劈同鄉，以至非禮強姦爆竊等惡性事件，多到十隻手指都數唔晒，市民想靜靜哋過個公眾假期都唔得。以前香港係亞洲最安全城市，家陣市民幾乎要組織更練團保衞家園，你話係咪該煨吖。
講開屈原，大家都知道佢係楚國大臣，一直反對楚懷王同強秦走得太近，懷王睬佢都傻不特止，仲聽信奸臣讒言，前後兩次將屈原流放。話說屈原被放逐到湘江、沅江一帶時，巧遇一名漁夫，漁夫見佢沿住沼澤行走吟唱，面容枯槁，就問點解堂堂高官都會搞成咁，屈原答佢︰「舉世皆濁我獨清，眾人皆醉我獨醒，是以見放。」意思即係整個世界都污糟邋遢，只有我乾淨；全人類都飲醉酒，唯獨我清醒，唔放逐我放逐邊個？
所以話啫，歷史唔會簡單咁重複，但往往驚人地相似。正義傳媒忠言直諫，針砭時弊，一向不容於港府，咁多年來各部門輪番針對打壓，大家有目共睹，特別係近年假難民禍港愈演愈烈，本報發揮第四權天職，先天下之憂而憂，率先踢爆相關亂象，並鍥而不捨進行監督，點知港府當耳邊風之餘，部分政客更聯同「人權衞士」，一再針對本報，亂扣「種族歧視」帽子。
好在公道自在人心，喺強大嘅輿論壓力下，港府終於肯面對現實，着手解決假難民問題，弊在做啲唔做啲，到喉唔到肺，淨係增加人手審批同執法，而冇切斷假難民來港食大茶飯嘅誘因，既唔肯退出國際難民公約，亦唔敢重設禁閉式難民營，同抱薪救火冇乜分別。冇錯，呢番道理已經講過N咁多次，讀者唔悶功夫茶都悶，但正如孟子話齋︰予豈好辯哉，予不得已也。港府一日唔改弦易轍，功夫茶都會一日復一日咁講落去。
以史為鑑，可以知興替，當年楚懷王唔聽屈原勸諫，最後果然被秦國所滅，今日港府繼續死牛一邊頸，香港遲早畀南亞幫踩沉嘅咋！