曹操都有知心友，關公亦有對頭人。有「漢奸黎」之稱嘅壹傳媒老闆黎智英爆粗兼涉嫌恐嚇本報記者，公然妨礙新聞自由，全城一致鬧爆，偏偏喺風頭火勢下仍然有人冒天下之大不韙，同漢奸暗通款曲，唔通佢哋有親？
呢嗱，《星島日報》尋日報道事件，話根據東網片段，可見漢奸黎「走向記者時臉帶怒氣，以食指指向記者，稱『我實搞你，我依家話畀你聽』，又指『我影×咗你張相o架！』，並涉以『×你老母×』辱罵記者」，點知跟手話鋒一轉，聲稱「片段經過剪輯，未能了解事件始末」。所謂「片段經過剪輯」，無非都係暗示事件並不簡單，東方有所隱瞞啫。
咁就好笑嘞。當日六四燭光集會號稱逾十萬人參與，眾目睽睽下，本報記者明明同漢奸黎隔咗七、八米，過程中並無任何提問同交流，即使係爛果報即時新聞亦只敢避重就輕，用「爭執」等字眼形容事件，家陣皇帝唔急急死太監，有人不惜戾橫折曲，顛倒黑白，中間有乜景轟？其實有睇過段片嘅都知，漢奸黎情緒失控繼而爆粗，記者罵不還口鎮靜回應，整個過程原汁原味，一氣呵成，邊忽「剪輯」過，《星島》憑咩無中生有，含血噴人？
正所謂受人錢財，替人消災，收咗黑金嘅政客撲出嚟護駕，一啲都唔出奇，但《星島》自詡愛國愛港報紙，照計同壹淫媒呢亭反中亂港傳媒道不同不相為謀，家陣居然掉轉槍頭幫敵人講說話，唔通有人收咗漢奸黎錢？咪話唔提醒，當年汪精衞「曲線救國」，結果遺臭萬年；今日有人等而下之，「曲線救奸」，助紂為虐，下場只會更悲慘嘅咋！
講到呢度，功夫茶不期然諗起「狼狽為奸」嘅成語故事。相傳狼嘅前腿長，後腿短，而狽就啱啱相反，後腿長，前腿短，狼靠狽可以疾行跳躍，狽靠狼可以快速奔跑，兩者一拍即合，做壞事事半功倍。今時今日邊個係狼邊個係狽就唔多講嘞，之但係有人兩邊押注，分散投資，就一啲都唔出奇。大家有眼見，除咗東方長期以來同反中亂港嘅洋奴針鋒相對，其他掛住愛國愛港牌頭嘅媒體，唔係對住淫媒好似鵪鶉咁，就係暗中勾結，依家甚至有人幫對家幫到出晒面，問你死未。所以都係毛伯伯講得啱，誰是我們的敵人，誰是我們的朋友，從來都係革命嘅首要問題。
一句講晒，玩火者必自焚！咪以為抹黑捏造，含沙射影好過癮，呢啲雕蟲小技功夫茶一樣有得出賣，他日某報老闆「行賄領導人」報道出街，莫謂「含茶噴人」也！