中環出更：旗袍之道 余嫿盡顯體態美不俗套

日前半島東扶輪社舉辦一場以中國古典服裝為題嘅晚宴，當晚Mary就身穿一襲以牛仔布製成嘅旗袍赴會。佢話自己好細個就已經接觸旗袍，因為媽媽年輕時經常穿着，而Mary第一次着旗袍係高中時代，因為有一次要登台彈奏古箏，媽媽因應場合為佢悉心準備一襲旗袍，Mary話着上身後，當即自覺挺胸收腹，務求時刻保持淑女儀態。Mary話唔少男士同樣對中國服有興趣，雖然未必及得女性咁貪靚，但設計同縫製男士中國服都一樣講究，冇得偷懶o架。

香港女律師協會副會長黃琦雅（Angela）都係鍾意着旗袍嘅女士，佢覺得旗袍唔單止展現中國傳統特色，仲可以凸顯女性體態同韻味，Angela覺得西式晚裝比較「蝦人着」，身材較為嬌小嘅東方女性着旗袍會更為合適，然而日常生活當中可以着旗袍嘅場合唔多，所以Angela會把握每個寶貴機會。由於自己鍾意唱作，每當演唱懷舊歌曲或新年嗰陣都會穿着旗袍過吓癮。

黃琦雅覺得身材較為嬌小嘅東方女性着旗袍會更為合適。（溫國佳攝）

陳威雄（左）同半島東扶輪社創社社長洪文正同樣着上紅色中國服，因為姓名中都有「紅」嘅諧音啊。

陳威雄考慮着中國服遮肚腩

當晚連男士都落足工夫，着起一身中國服，半島東扶輪社候任社長陳威雄（Derrick）都盛裝打扮。Derrick平時返工都係例牌西裝革履，會搵裁縫師傅度身訂造，因為佢話自己係「橡筋身材」，肚腩時大時細咁話。近來礙於疫情，多咗留喺屋企，又少咗出外行山做運動，體重已經去到人生巔峰添。Derrick仲講笑話以後可以考慮着中國服，冇咁貼身就可以遮一遮肚腩喇。

卓妮