俗語有云︰「得閒死唔得閒病」，意思即係話一個人幾忙都好，兩腳一伸就一了百了，徹底解脫。不過今時今日嘅香港，骨灰龕一位難求，死咗都仲有排閉翳呀！
係人都知，本港公營骨灰龕本來就供不應求，立法會日前三讀通過《私營骨灰安置所條例草案》，情況更加係雪上加霜，事關由法例下個月刊憲生效開始，私營龕場喺獲批發牌前，唔可以出售或者出租新龕位，外界估計私營龕位供應將會出現長達十八個月嘅真空期。
結果唔使問阿貴，就係大家趁住真空期來臨前趕搭尾班車，令原本已經熾熱嘅龕位炒風火上加油。據講新界區一個龕場，有龕位多年前被人以五十萬元購入，至早前放盤價已經漲至七十萬，相關條例通過後，叫價更即時破百萬大關，問你服未！
講嚟講去，一日最衰都係港產官僚，龕位供應不足問題，由周一鑊做食衞局局長講到依家高永文就嚟走頭，冇十年都有八年，當局一直關人個關，拖到前年終於叫做有時間表，但就要十幾年至解決到現時每年四萬個骨灰龕位需求，急驚風遇着慢郎中，蚊都瞓蛇都死；一方面係公營龕位供應奇缺，另一方面係當局對私營龕場冇監冇管，放任自流，符合法例要求嘅私營龕場得兩成咁大把，家陣當局揸正嚟做，萬一違規情況冇改善，實會有大量龕位被迫遷，到時唔通將先人骨灰暫存喺禮賓府吖？
所以話，香港人長壽都係為勢所逼，否則容乜易變遊魂野鬼o架？不過長命一樣有長命嘅煩惱，陰宅固然搶手，陽宅價格即使高處未算高，亦照樣爭崩頭。呢，尋日荃灣有新盤開售，四百零個單位吸引超過萬人認購，人龍幾乎排到過柴灣，唔少人豪擲幾千萬入貨。無他嘅，有瓦遮頭係最基本需要，加上港府增加供應同覓地起龕場一樣，都係得個噏字，大家睇好後市，自然貴一貴都有人肯接。當然喇，買得起天價樓嘅始終係少數，更多無殼蝸牛輪極都輪唔到公屋，一家大細屈喺豬欄、牛棚劏房，嗰種淒涼法真係不足為外人道。
香港人就係咁無奈嘅嘞，生老病死樣樣難，細個升學壓力大，讀飽書出嚟向上流動唔易，一個唔好彩捱到入廠，去公立醫院求診等於搵命博；硬硬淨淨撐到退休咩，又乜嘢保障都冇，輪個政府宿位分分鐘輪到死都未有，眼見雞碎咁多嘅強積金搣到七七八八，惟有繼續捱騾仔，如果唔係就唔會咁多人七老八十仲要揸小巴執紙皮喇！
以前就話「香港幾好都有，點捨得走」，家陣稍有條件嘅都爭住移民跳船，甚至連瓦魯阿圖都唔放過，都咪話唔悲哀！