香港競爭力每況愈下早就唔係新聞，但可能爛船仍有三斤釘啩，瑞士洛桑國際管理學院今年再次將全球最有競爭力地區嘅桂冠送畀香港，都咪話唔受寵若驚。不過咪開心得太早，事關連洋人都睇到香港樓價高昂，生活成本貴絕全球，再咁落去，爛船隨時變沉船嘅咋。
呢，本港最新私人住宅售價指數按月上升百分之二點一，已經連升十三個月，連帶今年首四個月租金亦上升百分之二點五，雙雙創下歷史新高，都咪話唔嚇人，亦印證咗世界競爭力報告所指，香港喺經濟表現「價格」一項嘅評分令人失望。梗係啦，香港住宅寫字樓租金高昂，生活成本指數喺全球六十三個地區之中排行尾二，僅僅好過以瘋狂通脹見稱嘅委內瑞拉，簡直羞家。
講真，香港樓價租金之高，已經去到脫離現實嘅地步，一個七百呎嘅新盤，叫價差不多二千萬元，除非有個富爸爸，否則一般打工仔諗都唔使諗。仲有喎，香港唔止不宜居，仲愈來愈不宜商，連屹立幾十年嘅老店都敵唔過天價租金而一間接住一間黯然結業，其他想創業嘅人士大多係夢碎收場嘅咋。近年唔少國際大企業都因為香港租金過高而卻步，紛紛將亞洲總部移師內地一線城市，肥水流向別人田咯喎，香港有乜法子唔愈做愈縮吖。
港府都知衰嘞，財政司司長陳茂波尋日又充當鍵盤戰士，承認租金成本高昂係經濟發展最大嘅不利因素，弊在講嚟講去嗰三幅被，一味話會增加土地供應，紓緩物業市場供求失衡嘅情況喎，都係廢話嚟嘅啫。唔係咩，現屆政府由朝到晚將「重中之重」掛喺嘴邊，結果唔止拓土建屋寸步難行，樓價仲愈升愈癲，無計可施之下，惟有求其「加辣」了事。正如「東方報業民意調查」嘅受訪者話齋，樓市嚴重扭曲，供求嚴重失衡，辣招只係適得其反，安居樂業愈來愈渺茫咯喎，民怨愈演愈烈就係咁解。
最諷刺係，呢頭港府呻地從何來呻到樹葉落，嗰頭坐視大量土地閒置養蚊。難為港產官僚仲自我感覺良好，下巴輕輕話收回棕地發展「別無他想」，仲話要研究開發郊野公園邊陲地帶建屋添。不過受訪者就一面倒睇死高官講就天下無敵，做就無能為力，仲批死當局無力處理房屋問題，遲早變成政治問題，呢啲咪叫呃到自己呃唔到人囉。
無計喇，樓市問題已經成為香港嘅「死症」，夕陽政府時日無多，拍拍屁股就關人個關。家陣冇嘢望，係望下屆政府真係做到嘢，新特首係咪「女媧補天」，係咪「好打得」，大家(目及)實喇。