廣東話歇後語講得好︰泥水佬開門口──過得自己過得人。有啲人平時開口埋口新聞自由，點知一到自己成為被監察對象就氣急敗壞，破口大罵，又「嚴厲譴責」又要求「道歉」，呢啲咪葉公好龍囉！
呢嗱，中文大學日前爆出韓籍學生懷疑隊草兼非禮女同學醜聞，東方報業集團第一時間派記者到涉事宿舍採訪，踢爆保安漏洞，原意係保障學生安全，點知有人不忿家醜外揚，竟然倒打一耙，繼宿舍所屬書院嘅學生會對報道表示不滿，中大學生會亦喺社交平台專頁批評有關報道，內容又係三幅被，話學生宿舍範圍係私人地方，記者進入採訪係侵犯私隱喎。
既然同學們揸住「私隱」當令箭，不如聽吓法律界人士嘅觀點喇。法律界出身嘅立法會議員係咁講嘅，大學宿舍嘅房間、洗手間等冇錯係私人地方，但走廊、電梯大堂等位置只屬保安管轄範圍，並非好似私人地方咁完全唔入得；亦有中大校董話，學生會嘅反應太誇張。好明顯，所謂「擅闖私人地方」，純屬無理取鬧。
退一萬步講，即使係私人地方，亦唔代表可以用嚟做擋箭牌。不妨打個譬喻，一個私人地方發生吸毒、非禮等刑事案件，警察完全有權進入調查；同樣道理，傳媒踢爆宿舍保安漏洞，都係為咗盡滿足公眾知情權，盡監察本分，何況全程冇影人樣冇影私人物品，保障私隱措施做到足，何錯之有？
係人都知，派記者實測機構保安情況，正正係同學們最鍾意講嘅國際慣例，最典型例子係前美國總統小布殊年前訪問英國，有當地報章記者獲聘到布殊下榻嘅白金漢宮做僕人，唔通白金漢宮唔係「私人地方」？好嘞，唔講外國咁遠，中大新聞及傳播學院出版嘅《大學線》幾年前發表題為「大學宿舍門常開」嘅封面故事，同樣派記者潛入包括中大等多間大學宿舍，唔單止發現「廁所門常開，浴簾不堪一擊」等保安漏洞，仲影埋女廁門口添，點解當時學生會粒聲唔出？此一時也，彼一時也，咁都仲唔係雙重標準，亂搬龍門？
始終都係嗰句︰天下人管天下事。大學設施用公帑建造，納稅人先至係真正嘅主人，反而宿生難聽講句其實只係「匆匆過客」。再講吖，大學宿舍近年亂象叢生，儼如罪惡溫床，宿生固然要深切反省，之但係講到宿舍保安問題咯喎，學校管理當局始終要負最主要責任，既然家陣有關方面已經亡羊補牢，變相認衰，同學們又何必死牛一邊頸呢？
功夫茶奉勸同學們一句︰面係人哋畀，架係自己丟，繼續滿紙歪理，硬拗到底，到時盞唔知邊個「蒙羞」嘅咋！