家陣世界立立亂，恐襲無日無之，受襲國都仲可以加強防範同反擊，但對於小動物嚟講，佢哋遭受人類發動嘅「恐襲」就毫無還擊之力嘞。「恐怖分子」係邊個？咪就係康文署囉，無啦啦走去修樹，結果變成鷺鳥大屠殺，冇陰功咯！
即係咁，香港遍布石屎森林，但同時又係華南地區一大鷺鳥棲息地，都咪話唔難能可貴，啲美麗鷺鳥喺海面翩翩飛翔，係一大美景嚟o架。可惜吖，康文署好做唔做，日前竟然派人到全港第二大嘅大埔鷺鳥林修樹，結果搞到巢覆鳥墜，唔少小鷺鳥毛都未長齊就一命嗚呼，仲有好多蛋殼碎裂一地，用屍橫遍野嚟形容都唔誇張，就連到場執屍嘅動物義工都忍唔住落淚，就知呢件事幾咁冇人性嘞。嗱，事發不過一日咋，網上已有超過七百人聯署投訴康文署，呢啲咪叫眾怒難犯囉。
真係諗極唔明，上址既然被評為具有特殊科學價值，目前又正值鷺鳥繁殖期，點解康文署係都要派人修樹，非要搞到鷺鳥流離失所、巢破雛亡至安樂呢？仲有喎，一個二個鳥巢高掛樹上，盲嘅都睇到喇，有乜理由外判工人依然照毀可也呢？嗱，謎底尋日解開嘞，當區區議員話喎，上址經常被街坊投訴布滿雀糞，而且充斥異味，相信康文署接到投訴，為免畀人鬧食嘢唔做嘢，咪唔理三七廿一派人剪晒啲樹枝囉，至於外判工人只係跟order做嘢，做完就收工，梗係關人個關啦。
康文署官僚僵化，冇神經冇靈魂，淨係識按本子辦事，話佢哋係冷血殺手都不為過。事件亦反映部門之間毫無溝通，如果康文署修樹之前同漁護署傾吓，了解吓嗰度嘅生態價值，或者一場大屠殺就可以避免。再講吖，雀糞雖然影響衞生，但加強清潔咪可以解決囉，使乜趕盡殺絕喎。見微知著，港府開口環保埋口保育，實際上講一套做一套，根本係葉公好龍嘅咋。
當然啦，港府保育得把口，固然係罪魁禍首，但部分市民唔肯學習跟大自然和平共處，郁啲就投訴，郁啲就趕絕，亦係難辭其咎。大家有眼見，隨着經濟高速發展，香港嘅保育地帶買少見少，好多「原居民」動物唔係無家可歸，就係絕種，點解大家唔可以高抬貴手，畀自然界有個喘息空間呢？唔通雀仔嘅叫聲擾人過掘地鑽路嘅噪音咩？唔通花草樹木唔賞心悅目過高樓大廈咩？
正如佛家話齋，欲知前世因，今生受者是；欲知後世果，今生作者是。怕且有啲人下輩子真係要試吓變做雀鳥或者其他動物嘅滋味，先至體會到佢哋嘅所作所為係幾咁自私殘忍咯。