美國前總統列根講過︰「政府唔係解決問題嘅方法，政府本身就係問題所在」，呢句話形容港府部門一樣咁貼切。好似食環署咁吖，滅蚊不力都算嘞，仲要帶頭養蚊，你話係咪靠害呀！
冇冤枉o架，本報記者日前去食環署轄下嘅紅磡市立殯儀館睇過，發現天台布滿兩吋深、面積有成個籃球場咁大嘅「水池」，加上雜草亂生，以致蚊蟲孳生。睇真啲，整幢大廈廢棄已久，十室九空，部分室內地方亦有積水，衞生環境認真得人驚。
呢，附近街坊今個月初已經發現蚊患嚴重，屋企細路被叮到通身都係，向食環署投訴，點知對方關人個關，直至本報介入至急急補鑊，簡直唔見棺材唔流眼淚。係人都知，日本腦炎、登革熱及瘧疾係本港常見蚊傳疾病，而蚊子成長速度又快，尤其係多種病菌宿主嘅白紋伊蚊，最為可怕，食環署闊佬懶理，分分鐘爆發疫症，死得人多o架！
有立法會議員就講得啱嘞，食環署呢頭叫市民積極滅蚊，嗰頭連自己地方都搞唔好，收到投訴又唔跟進，擺明失職。其實食環者滅蚊不力，已經畀人鬧咗N咁多年，該署放置嘅誘蚊產卵器蓉蓉爛爛形同虛設，連審計署都開腔炮轟過。至於滅鼠表現，就更加冇眼睇，大過貓嘅老鼠周不時喺鬧市出巡，老鼠傳染病個案亦死灰復燃，食環署官僚想唔認食塞米都唔得喇。
不過又難怪嘅，蛇鼠一窩吖嘛，食環署冇嘢多，最多就係大懶蛇。淨係一個小販管理隊小隊，得嗰八丁友之嘛，就畀本報踢爆返工時間歎茶飲酒喺辦公室搞家庭聚會瓣瓣齊，打工皇帝梳乎到佢哋咁，難怪咁多烏煙瘴氣。至於其他部門嘅懶蟲亦不遑多讓，遲到早退有之、生龍活虎請病假有之、健身當返工有之、呃OT補水有之……列晒出嚟，直頭夠寫一本《官場現形記》。
當然喇，港府部門做嘢錯漏百出，甩漏多多，員工懶到出汁固然係大問題，冇心冇肺先至最大鑊。講番殯儀館養蚊呢單，原來問題只係出在有去水口淤塞，點解手板眼見工夫都冇人跟一跟？如果平時有做最基本例行檢查，就唔使搞成今日咁。同樣道理，公立醫院醫療事故不絕如縷，其實好多都係低級錯誤，只要前線醫護盡職少少，check清楚病人病歷，悲劇根本可以避免。
本港公務員隊伍同埋公立醫療水準曾幾何時傲視全球，家陣之所以墮落成咁，皆因上樑不正下樑歪，夕陽政府在上位嘅但求平平安安軟着陸，做一日和尚敲一日鐘，多一事不如少一事，基層嘅又點會攞個心出嚟做嘢吖？