李春天爽朗性感

正所謂「唔怕生壞命,最怕改壞名」,因此就算大家迷信又好,想好聽啲又好,都會花上唔少心思改名。而南韓車模李春天,雖然有人覺得佢個名老土,但係佢一啲都唔介意,更希望自己好似春天咁,將暖意帶畀大家。

完美體態

春回大地嘅暖意固然令人心醉,而夢想可以將暖洋洋感覺,帶畀大家嘅南韓模特兒李春天,佢所散發出嚟嘅熱度一啲都唔似春天,反而好似夏天咁火熱。出生於南韓首爾嘅佢,喺2014年於釜山舉行嘅賽車比賽中,以賽車女郎身份首次登場,當時佢以性感低胸賽車女郎制服示人,立即成為全場焦點。皆因佢擁有高挑身材,而前凸後趷嘅火辣三圍,喺貼身嘅制服下呈現出完美體態,加上樣子甜美,即使平日走在街頭,都必然引嚟極高「回頭率」,更何況家陣佢喺賽場上出現,試問又點可能唔吸引眾人嘅目光呢?憑住呢次成功嘅演出,令佢成為炙手可熱嘅新進賽車女郎,更成為網絡熱門搜尋人物。

及後,春天踏出賽場,喺超級跑車展以車模身份示人,挾住網絡上嘅超高人氣,成為展場中最亮眼嘅車模。透過呢次同大眾近距離接觸,大家發現佢唔單止外形迷人,原來性格相當爽朗,唔似得一般車模咁Cool,因而被封為爽朗女孩。翌年佢又喺車展演出,不過唔係做車模,而係擔任DJ,原來春天有相當嘅音樂造詣,曾學過做DJ,因而獲大會賞識,邀請佢表演。

熱愛泰拳

雖然春天踩入DJ界,但係佢深知音樂並唔係自己嘅專長,因此以車模及賽車女郎工作為主。可能大家會有疑問:「點解佢嘅工作都係同車有關嘅?」春天就話要先做好自己嘅本分,先至諗其他範疇嘅工作。而隨住工作經驗不斷累積,自去年初開始,佢便接觸化妝、時裝等平面模特兒工作,同時又為雜誌拍攝寫真。呢個轉變不但令佢活動範圍大增,更透過唔同嘅造型,讓大家更能認識到佢唔同嘅一面。春天人氣愈嚟愈高,其私生活亦受到關注,究竟呢位被喻為未來模特兒界天后,平日生活係點嘅呢?佢表示自己係個低調嘅人,但唔代表佢鍾意匿埋喺屋企,平時最常做健身,以保持優美身段,仲有熱愛爬山,希望有朝一日能夠挑戰喜瑪拉雅山添!此外,佢最愛做瑜伽,因為可以令大腦同身體放鬆,有助減壓。不過講到最近佢至愛嘅活動,就係打泰拳,佢表示作為現代女性,好應該識得自我保護,而唔係搵其他人保護自己,從呢個角度睇,春天嘅性格都幾Man喎。

精彩推介

簡介:從外表睇,春天一啲都唔似識打泰拳,覺得佢似鍾意美容同化妝多啲,事關佢外形充滿女人味,加上前凸後趷嘅火辣身材,試問又點會想像到佢戴住拳套打泰拳呢?不過大家唔好以為佢性格好勇鬥狠,其實佢對小動物好有愛心o架!大家Click上佢嘅IG就會見到好多佢同動物嘅合照喇。

網址:https://www.instagram.com/lee_bomyi/

李春天Profile

出生地:首爾

身 高:171cm

三 圍:35、24、35

撰文:魂