「等埋發叔」大家聽得多，「等理麒哥」聽過未呀？嗱，尋日立法會上演「等埋麒哥」騎呢一幕，結果又搞到流會收場。今屆立法會正在重複上屆拉布流會當食生菜嘅不光彩歷史，隨時打破埋上屆流會最多嘅恥辱紀錄，一啲都唔出奇o架。
嗱，特首選舉塵埃落定，反對派造王失敗，深深不忿就梗嘅喇，反對派議員郭家麒尋日趁立法會開大會，提出促請下任行政長官重啟政改嘅無約束力議案。本來呢，小圈子選舉早就備受詬病，重啟政改亦係唔少市民嘅心願，議員提出討論無可厚非，大家一心以為立法會將有一場火花四濺嘅辯論，點知朝早議事堂內居然只有二十八名議員在席，遠遠不足於法定人數三十五人，郭家麒更加連影都冇。眼見時間無多，會議隨時提早玩完，同一陣線嘅反對派議員惟有要求響鐘點人數拖延時間，可惜事與願違，郭家麒始終趕唔切現身，人數不足咯喎，咪流會收場囉。
咪以為人數不足一定係建制派專登搞杯葛喎，事實啱啱相反，建制派有二十二人出席，反對派就算計埋郭家麒都係得七人咁大把，你話係咪荒謬吖。正所謂懶人多藉口，郭議員話喎，遲到係因為前晚準備議案資料搞到難以入眠，起身遲咗，再加埋途中塞車，總之乜都係佢講晒。其他失蹤政客一樣卸得就卸，醜態百出。立法會主席話佢哋對唔住選民應該反省喎，咪即係對牛彈琴。
講真，立法會有名你叫垃圾會，莫講話拉布流會有如家常便飯，就算政客難得出席會議都係心不在焉，唔係辦私事就係剪指甲，唔係睇AV就係夢周公，唔係爆粗就係擲物，沒有最醜只有更醜。話時話，上屆垃圾會四年來總共流會十八次，打破歷屆紀錄，今屆開波半年已經第五次流會，睇嚟想唔再破紀錄都幾難。
真係愈講愈火滾，議員薪高糧準兼有各種津貼，出席會議係最基本要求，正如學生要返學、打工仔要返工一樣，偏偏部分政客平時滿口仁義道德，將「民主」、「普選」、「國際標準」掛喺嘴邊，點知一到做正經嘢就毫無職業道德，連開會都嫌費事，講一套做一套，律人以嚴，待己以寬。試問呢啲低質素政客有乜可能真心為民請命吖？又有乜資格對港府說三道四吖？仲話爭取真普選喎，重啟政改喎，盞嘥氣嘅咋。
講到底，最冤枉都係納稅人，將血汗錢貢獻嚟養呢班蛀米懶蟲，仲衰過丟落鹹水海。計功夫茶話齋，政客有破壞冇建設，一蟹不如一蟹，旨意佢哋監督政府蚊都瞓蛇都死喇。議員嘅民望仲低過官員，就係咁解！