開講有話同行如敵國。台北市長柯文哲近排喺泰國宣傳旅遊，被問到泰國赴台旅遊人次近年不斷增加、係咪有望超越香港，佢批評香港只不過係一個好無聊嘅小島，冇咩嘢好玩，又話陽明山夜景更勝太平山夜景喎。
即係咁，人稱「柯P」嘅柯文哲出名大嘴巴，從來都係山草藥噏得就噏，踩低別人抬高自己，一啲都唔出奇，之但係如果唔因人廢言，香港景點嚟嚟去去三幅被，唔係金紫荊廣場就係主題樂園，唔係星光大道就係昂坪360，又的確係幾腌悶。有網民就講得啱嘞，香港通街都係珠寶店、藥房、電器舖，你叫外國人嚟睇乜呢？
當然喇，香港畀人踩到上心口，官老爺點都要有番啲表示。商務及經濟發展局局長蘇錦樑話喎，香港呢個小島好豐富，可以帶嚟好多唔同嘅旅遊體驗；佢仲愈講愈興奮，話每年訪港旅客數字唔簡單，今年頭兩個月來港旅客錄得百分之一點四升幅，上月頭兩個禮拜更錄得百分之五點五升幅添。
唔知大家有冇發現蘇錦樑呢番話熟口熟面，十年前鬍鬚曾做緊財爺嗰陣，面對澳門大型度假村開幕，一樣係氣定神閒，強調本港旅遊會展業成就唔係膚淺，無懼競爭。冇錯，香港地除咗血拼美食之外，仲有好多吸引外國旅客嘅特色，問題係港產官僚坐而論道，講咗等於做咗，旅遊資源再豐富都係假。
舉個例子，麥理浩徑唔止深受本港行山人士歡迎，更獲外國傳媒評選為全球二十大夢想郊遊徑之一，弊在港產官僚捉到鹿唔識脫角，當年沙士過後推廣綠色生態遊，三分鐘熱度過後就不了了之，簡直暴殄天物。話時話，港府拓展景點同拓土建屋一樣，多年來都係毫無寸進，淨係開發大嶼山，講到天花龍鳳，一時話打造商業購物城，一時話發展搞水療度假村，結果咪又係煲無米粥。
本來呢，香港背靠內地，十三億人市場龐大，即使景點單調啲，照計仲有好多新客源，可惜偏偏有人自絕財路，「驅蝗」、「光復」鬧劇不斷上演唔在講，強迫購物、打死旅客等醜聞更加係不絕如縷，係人都怕怕。呢方面，台灣同香港可以話係難兄難弟，明明陸客撐起旅遊業半壁江山，卻係都要趕走財神，搞到業界冇啖好食，如果唔係台灣當局焗住「南向」轉攻東南亞客，柯P同香港呢場口水仗都未必打得起上嚟喇。
始終都係嗰句，此處不留人，自有留人處，世界咁大，好玩好客嘅地方多的是，旅客唔嚟香港亦唔代表要幫襯台灣。一個地方不斷趕客，孤芳自賞，最終只會自己攞嚟衰！