世事好多嘢唔係夠膽夠薑講出來就得，明明是豬扒，唔通講句自己「漂亮第一」就可以自我感覺良好：國色從來有人妒，莫教紅袖倚闌干？
講真，真有料到人哋有眼睇，冇料卻要標榜乜乜第一，徒惹笑柄。最近，自稱「公信第一」嘅《明報》，確實大有進步，從「老作第一」升階至「驚嚇第一」，民望有啲起色嘅ＣＹ，真係多得佢唔少，喺如此敏感嘅時刻，竟然將特首梁振英在十一酒會「致辭」變成「辭職」，呢招「驚嚇第一」算係本年度最佳新聞傑作，咁大整蠱，說幾句例牌賀詞啫，竟然搞到要「辭職」咁大鑊，「家山回首三千里，目斷天南無雁飛」，阿哥，乜咁大仇口啊！
《明報》出錯，習以為常，一年到晚在「道歉」同埋「更正」，如果仲「公信第一」高懸報頭，確實好鬼刺眼！老朽但知一個無知但充滿社會責任感嘅人，可能還不如一個無知但沒有社會責任感嘅人，因為前者會給社會帶來更大的破壞力。觀乎《明報》常常「更正」，時時「道歉」，卻死攬住甚麼「公信第一」，正正是前者的最佳說明。語云「知恥近乎勇」，與其不斷更正更正更正道歉道歉道歉，不如把欲斷難斷嘅「公信第一」除下來吧，如此，今後即使再「乳」出驚人，也如o靚模不經意烏低身，露一露事業線而已，大家嘩一聲也就嘻哈完算了！
呢個世界，競爭從來要講實力，並非玩文字遊戲，推銷伎倆周時見；好似髮廊前加上「正規」，彼此就心安了；煙酒前加上「專供」，價格就能提高……然而，報紙要多賣幾份，加上「公信第一」，讀者就會信到十足？若然如《明報》嘅「公信第一」，卻是信佢一成，雙目失明！「公信」咁抽象，咪以為高高掛起，就當係莫內名畫《印象‧日出》來欣賞至得o架！適時放下，再錯也樂得自在。