慘慘慘，橙橙橙，黑心食品嚇破膽，家陣食橙都咁慘！
內地傳媒揭發，贛南臍橙協會規定當地臍橙最早嘅採摘期係十月十五日，但係北京早於十月初已經有臍橙到貨。究竟點解？有農藥店主解釋，臍橙由青變黃嘅玄機其實係加咗工業用乙烯利，以及理論上應該禁用嘅化學染色劑蘇丹紅。加工廠為咗避開監察，匿藏於隱蔽地點同埋夜晚開工，工人將臍橙催熟並且烘乾，再用染料粉打蠟上色。有廠長向內地記者展示染色之後嘅臍橙，任君選擇嘅效果包括大紅色、橙紅色或者自然紅等等。
好嘞，靠山吃山，靠水吃水，背靠祖國嘅香港當然吃祖國，本地生果店有冇呢一種經過催熟以及染色嘅臍橙出售呢？答案好不幸係有嘅，業界人士證實，近日油麻地果欄有江西臍橙入口，每日大約三百幾箱，提醒消費者選擇臍橙唔好貪靚只睇外表，否則隨時中招。
金玉其外，敗絮其中，本報記者從花園街購得呈現鮮橙紅色嘅江西臍橙，經熱水浸泡之後，用紙一抹就發現顏色脫落。學者就話嘞，乙烯利係催熟劑，毒性唔算高，反而禁止使用嘅染料蘇丹紅毒性強得多，足以損害基因，甚至可能致癌，即使清洗橙嘅表面，亦不能洗去有毒成分，隨時滲入果肉。
喂，蘇丹紅致癌其實好多人都知啦，事關神州大地各式各樣嘅黑心食品之中，蘇丹紅已經唔係第一次被發現，消費者早就聞風喪膽。問題係，點解一眾奸商仍然樂此不疲呢？因乜事幹監管仍然百密一疏呢？
講到監管咯喎，特區政府自然責無旁貸。食安中心話喎，會喺進口、批發及零售層面抽取包括橙在內嘅食物樣本測試，確保食物符合本港法例規定及適宜供人食用，去年抽取超過三百個橙樣本測試，全部結果滿意。即係咁，唔該食安中心醒醒定定，全部結果滿意唔代表全部生果冇毒，官老爺瞓懶覺走漏眼好大鑊o架！
唉，其實講真吖，功夫茶有時真係懷疑中國人集體感染一種古怪到極嘅神秘病毒，姑且叫做「自我毀滅流行性病毒」，否則好難解釋點解會有咁鬼死多害人不淺嘅黑心食品。你知啦，中國人崇尚嘅係民以食為天，乜都食得落肚，既然黑心食品氾濫成災，容乜易搞到中華民族走向滅亡之路。
今時今日，國產貨品唔係假冒就係有毒，功夫茶真心誠意奉勸國家領導人一句，要反貪就要反到底，絕對唔容許貪官繼續包庇奸商製造禍國殃民嘅黑心食品，唔係咯喎，新一代東亞病夫冇能力同日本爭奪釣魚島o架！