大帝要做全球偶像

「波神」米高佐敦(Michael Jordan)早前指巔峰時刻能一對一解決勒邦占士(LeBron James),未知「大帝」是否被激親,近日於訓練營表示來季一定要求變,更指會重拾過去為粉絲拋爽身粉環節,加上其球衣銷量穩居全球首位,種種迹象顯示「大帝」誓要力爭三連冠重拾過往霸氣。

熱火完成兩連冠後將面臨新挑戰,儘管呢支球隊年齡老化嚴重,但「大帝」表示球隊唔會停滯不前,勢必保持活力以全新面貌去追逐三連冠霸業。占士表示:「好明顯球隊仲需要升級,我哋唔可以繼續保持上季水平停滯不前,咁樣唔足以再奪總冠軍。隨住訓練嘅加強同比賽展開,我哋會睇到好多嘢,去追求對球隊最有益嘅打法。當然,成季嘅整體打法係唔會變,但過程一定有啲變化。」

再拋爽身粉冧球迷

除球隊打法要有變化外,占士自己似乎亦有一點改變。「大帝」近日於instagram上載一張圖片,竟然係以前嘅拋爽身粉招牌動作,下面標籤則寫上「拋爽身粉嘅動作將返嚟你附近嘅場館!」,意味占士新球季將重玩拋爽身粉。拋爽身粉係「大帝」的標誌性動作,但係佢近幾年表示要專注比賽而放棄呢個習慣,占士表示:「因為我熱愛我嘅球迷,佢哋想呢樣嘢返嚟,所以我會為我嘅球迷咁做。」

占士熱愛球迷,當然係因為呢班粉絲願意慷慨解囊購買佢嘅球衣。據《美聯社》日前公布NBA球衣全球銷量榜,占士力壓戴歷羅斯(Derrick Rose)及高比拜仁(Kobe Bryant)高踞榜首,得悉此結果後「大帝」相當興奮:「知道咁多人崇拜我對我嚟講意味住好多嘢,我會繼續努力等佢哋將我當做偶像。我明白着波衫其實係一種信仰,我好感激一眾球迷。」占士正朝着人生最高目標邁進,三連冠將成為佢首要達成嘅任務。