不聽本報言，吃虧在眼前。早前本報「探射燈」報道，近年魚排亂象叢生，危機四伏，萬一唔好彩發生意外，隨時一鑊熟。點知言猶在耳，大埔三門仔尋日就有魚排發生火警，你話靈唔靈吖。
話說大埔三門仔避風塘對開魚排尋日凌晨突然起火，並傳出爆炸聲，烈燄沖天，消防處出動逾三十人到場撲救，約半小時將火救熄，結果一個魚排嚴重焚毀，兩艘快艇亦受到波及付之一炬。好彩事件中冇人受傷，總算係不幸中之大幸。
當局指今次火警不排除電線短路引起，初步相信事件無可疑喎。不過咁，功夫茶始終認為，不怕一萬，最怕萬一，魚排火警一次都嫌多，如果經營者唔識得吸取教訓，而當局又唔識得加強監管，無人敢保證類似事件唔會重演。
唔係危言聳聽㗎，依家閒釣魚排開到成行成市，由於競爭激烈，唔少經營者紛出「奇招」搵食，搞到七國咁亂。呢，西貢有魚排違例提供香蕉船及滑水等水上活動，而大埔就有魚排違規供應海鮮餐、燒烤甚至麻雀耍樂。最離譜係，有啲魚排唯利是圖，多多益善，牌照規定只可容納一百五十人，經營者竟聲稱可容納四百人，超載一倍有多，萬一發生意外咯喎，遊客隨時一鑊熟！
呢，本報記者到大埔鹽田仔嘅釣魚會睇過，該處由十幾個魚排組成，設有大型垂釣池，並有多間廂房供遊客燒烤及玩樂，每逢假日仲大排筵席添。其實法例規定，魚排出售食物需要申領食物業牌照，賣酒亦需要酒牌，而食環署就證實目前並無魚排獲發食物業牌照，即係話有魚排涉嫌違規經營喇。
老實講，違法售賣食物及酒類仲係其次，魚排嚴重超載先至係大件事。大吉利是講句，萬一魚排發生火警或沉沒等意外，幾百人逼埋一堆，難以逃生，後果不堪設想。正所謂，欺山莫欺水，舊年南丫島海難造成三十九人死亡，令人慘不忍睹，唔通咁快就忘記教訓？
講到底，魚排違規情況普遍，一係相關政策過時，二係當局監管不力。正如業內人士話齋，當局○二年推行閒釣計劃，雖然吸引唔少漁戶轉型，亦令魚排買賣活躍，可惜由於成本太高，維修費龐大，根本搵唔到食，唔少魚排惟有被迫違規經營，導致亂象叢生。咁多年來業界一直就此問題同漁護署傾，點知漁護署就推畀食環署同消防處，到依家仲未有下文。嗱，咪話功夫茶唔提醒吖，尋日魚排火警就係一個警號，如果當局繼續闊佬懶理，漠視危機，遲早爆大鑊嘅咋！