醫管局最新一期《風險通報》才揭發了公立醫院八十四宗嚴重醫療事故，其中涉及遺留手術用品、儀器等在病人體內的多達二十三宗，把病人視作「人肉儲物櫃」幾乎是例牌菜，甚麼手術導線、止血紗布、手術儀器……都算了！然而，就在周一鑊強調「如通報及處分機制太苛刻，可能令有關醫護人員不敢上報事故」，又發生了令人匪夷所思的「大贈送」。
話說一名七十歲老翁，日前因為爆肺被送到明愛醫院治理，需插喉入肺放氣。醫療人員疑疏忽，把開胸刀片遺留病人體內，病人需轉送伊利沙伯醫院，伊院又遲遲未施手術，幾經家屬催促始取出刀片，但已割傷病人橫膈膜及肺組織，有生命危險。
刀片非髮絲或針線，相當顯眼，這樣也會留在病人體內，確令人費解，連醫學專家也不相信，反問點會咁？這是百年一遇的「大贈送」，睇怕穩操勝券成為醫療事故史新的一頁。周一鑊話「如果係處分，都內部處分，唔會公開譴責員工」，如果咁都唔公開譴責，如果咁都唔紀律聆訊，如果咁都唔需要停牌或釘牌，公立醫院的醫療事故必定愈來愈離奇，愈來愈令人髮指！周一鑊，你的溫柔乃是姑息養庸醫。
生死一線，救急扶危的醫生，何以會「難得糊塗」至此，大拿拿成把刀留喺一位七十歲病人的肺內？大佬啊，你一路做手術一路發白日夢呀？你係庖丁解牛，不以「目視」而只以「神遇」，只是這趟偶爾失神？你係醫生，豈可以如清末民初大書畫家一邊作畫、一邊自得其樂的吟詠：「我性疏闊類野鴨，不受束縛雕雋中。」行行好，醫「生」！